Honor kompaniyasi hali sotuvga chiqmagan Honor Robot Phone smartfoni haqida yangi tafsilotlarni ma’lum qildi. Qurilma ilk bor MWC 2026 ko‘rgazmasida namoyish etilgan edi.
Kompaniya vakillariga ko‘ra, Robot Phone asosan mobil video suratga olish uchun ishlab chiqilgan. Honor bu model orqali murakkab videotasvirlarni oddiy foydalanuvchilar uchun ham qulay qilishni maqsad qilgan. Smartfonning asosiy jihati uning motorli uch o‘qli gimbal kamerasi bo‘ladi. Kamera moduli qurilmaning yuqori qismida joylashadi va turli sahnalarga qarab oldinga yoki orqaga aylana oladi.
Honor’ning tasvirlash jamoasi bunday yechim oddiy smartfon kameralaridagi cheklovlarni kamaytirishini bildirdi. Kompaniya kelajakda bu tizim orqali yangi apparat imkoniyatlari va suratga olish usullarini qo‘shmoqchi.
Robot Phone 200 megapikselli kamera sensori bilan jihozlanadi. Honor professional kino sanoatida tanilgan ARRI kompaniyasi bilan hamkorlik qilmoqda. Qurilmada sun’iy intellekt asosida obyektni kuzatish, avtomatik kadr tanlash va aqlli suratga olish yordamchisi bo‘ladi. Shuningdek, avtomatlashtirilgan kamera harakatlari va AI yordamida video montaj qilish funksiyalari ham qo‘shiladi.
Kamera mexanizmi harakatlanuvchi bo‘lgani sabab, uning chidamliligi eng ko‘p muhokama qilinayotgan masalalardan biri bo‘lib turibdi. Honor birinchi avlod Robot Phone tushishga chidamlilik bo‘yicha flagman smartfonlariga yaqin darajada bo‘lishini bildirdi.
Biroq kompaniya suvdan himoya qilish borasida hali takomillashtirish zarurligini tan oldi. Honor bu yo‘nalishdagi ishlar keyingi avlod qurilmalarida ham davom etishini ma’lum qildi. Kompaniya muhandislari Robot Phone ustida taxminan bir yil ishlagan. Ular ixcham motor yaratish, gimbal tizimini muvozanatlash va aylanish kuchlari bilan bog‘liq muammolarni hal qilishga e’tibor qaratgan.
Honor’ga ko‘ra, qurilma videoga olish tajribasi kam bo‘lgan foydalanuvchilar uchun ham mos bo‘ladi. Smartfonda tayyor suratga olish andozalari va avtomatik kuzatuv funksiyalari bo‘ladi. Bu imkoniyatlar foydalanuvchiga qo‘lda sozlama kiritmasdan silliq va kinoga yaqin videolar olishga yordam beradi.
Qaynoq24.uz internet nashri Honor X7e smartfoni taqdim etilgani haqida yozgan edi.
