Samsung Galaxy S26 Ultra va Galaxy S25 Ultra bir xil — 5000 mA/soat sig‘imli akkumulyatorga ega. Bu haqda Sammobile nashri xabar bermoqda.
Biroq yangi avlod modelida batareya hajmi oshmagan bo‘lsa-da, real foydalanishdagi tajriba sezilarli darajada yaxshilangani aytilmoqda.
Galaxy S26 Ultra’ning asosiy ustunligi akkumulyator sig‘imida emas, balki quvvatlash tezligi, energiya samaradorligi va issiqlikni boshqarish tizimida ko‘rinadi. Ya’ni smartfon bir xil hajmdagi batareyadan samaraliroq foydalanadi va tezroq quvvat oladi.
Yangi model 60 vattli simli quvvatlashni qo‘llab-quvvatlaydi. Bu Galaxy S25 Ultra’dagi 45 vattli quvvatlashdan yuqori ko‘rsatkich hisoblanadi. Ma’lumotlarga ko‘ra, Galaxy S26 Ultra 30 daqiqada taxminan 75 foizgacha quvvat olishi mumkin. Bu foydalanuvchi qisqa vaqt ichida qurilmani kunning qolgan qismiga yetadigan darajada quvvatlab olishini anglatadi.
Simsiz quvvatlashda ham o‘sish bor. Galaxy S26 Ultra 25 vattli simsiz quvvatlashni qo‘llab-quvvatlaydi, Galaxy S25 Ultra’da esa bu ko‘rsatkich 15 vatt edi. Yangi model 33 daqiqa atrofida 50 foizgacha quvvat olishi mumkin. Biroq maksimal tezlik uchun mos quvvatlagich kerak bo‘ladi. Shuningdek, Galaxy S26 Ultra’da ichki magnitlar bo‘lmagani sababli Qi2 magnitli g‘ilofdan foydalanish tavsiya qilinadi.
Akkumulyator ishlashiga Snapdragon 8 Elite Gen 5 for Galaxy chipi ham ta’sir qiladi. U 3 nanometrli texnologik jarayon asosida ishlab chiqarilgan. Bu chip energiyani tejamkorroq sarflab, bir quvvatda ko‘proq vazifani bajarishga imkon beradi. Shu sababli o‘yinlar, video, navigatsiya, ko‘p vazifali rejim va Galaxy AI funksiyalarida batareya samaradorligi yaxshilanishi kutilmoqda.
Galaxy S26 Ultra’da issiqlikni boshqarish tizimi ham kuchaytirilgan. Smartfon Galaxy S Ultra seriyasida Samsung qo‘llagan eng katta bug‘ kamerasi bilan jihozlangan. U Galaxy S25 Ultra’ga nisbatan issiqlikni 21 foizgacha yaxshiroq tarqatishi aytilmoqda. Bu uzoq o‘yin seanslari, video yozish va og‘ir ilovalar bilan ishlaganda qurilmaning barqaror ishlashiga yordam beradi.
Qaynoq24.uz Samsung Galaxy Jump 5 smartfoni qanday narxda sotilishi haqida yozgan edi.
