O‘tgan besh yilda oshqozon kasalliklari butun respublika bo‘yicha 1,5 barobar qisqargan. Bu haqda prezident va tibbiyot xodimlari uchrashuvida ma’lum qilindi.
Qashqadaryo va Navoiy viloyatlarida deyarli o‘zgarish bo‘lmagan. Yakkabog‘da murojaatlarning 33 foizi, G‘uzorda 29 foizi, Koson va Mirishkorda esa 25 foizi oshqozon-ichak kasalliklariga to‘g‘ri keladi.
Shifokorlarning antibiotiklarni hali ham tartibsiz qo‘llayotgani tanqid qilindi. Tumanlarda shifoxona va poliklinika vrachlariga qaysi dori mumkin va qaysi biri mumkin emasligini o‘rgatish ishlari sust ekani aytildi.
Buyrak kasalliklari ulushi Qoraqalpog‘iston, Xorazm, Farg‘ona va Andijonda respublika ko‘rsatkichidan 40-50 foiz yuqori. Bu hududlarda ko‘rsatkichlar yillar davomida kamaymayapti. Urologiya markazi va Nefrologiya markazi rahbariyati pastga tushib, profilaktika bo‘yicha amaliy ishlarni kuchaytirishi kerakligi qayd etildi.
Avvalroq Qaynoq24.uz nashri 2026-yildan boshlab tibbiyot xodimlari besh kunlik ish rejimiga o‘tishi haqida yozgan edi.
