Oliy Majlis Qonunchilik palatasi deputatlari O‘zbekiston va Vengriya o‘rtasida jinoyatchilarni ekstraditsiya qilishga doir shartnomani ratifikatsiya qilish haqidagi qonun loyihasini ma’qulladi. Hujjat 2025-yil 20-may kuni Budapesht shahrida imzolangan.
Hozirgacha ikki davlat o‘rtasida jinoyatchilarni topshirish masalasida alohida kelishuv mavjud emas edi. Yangi bitim 26 moddadan iborat bo‘lib, shaxslarni qanday hollarda, qanday tartibda va qay shartlar asosida bir davlatdan ikkinchisiga topshirish mumkinligini belgilaydi.
Deputatlarning aytishicha, hujjat kuchga kirgach, ikki davlat huquqni muhofaza qiluvchi organlari jinoiy ishlarni samaraliroq tergov qilish, jinoyat sodir etgan shaxslarni jazodan qochishiga yo‘l qo‘ymaslik imkoniyatiga ega bo‘ladi.
Qonun loyihasi ko‘rib chiqish uchun Senatga yuborildi.
Avvalroq Qaynoq24.uz nashri geografik obyektlar nomini belgilash tartibi yangilangani haqida yozgan edi.
