“El-yurt umidi” stipendiyasi yoshlarning chet elda ta’lim olishini qo‘llab-quvvatlashga qaratilgan eng muhim davlat dasturlaridan biridir. Adliya vazirligi ushbu stipendiyani olish bo‘yicha qo‘llanma tayyorladi.
Ochiq tanlovlar yil davomida muntazam o‘tkaziladi. Amaldagi tartibga ko‘ra, tanlov kamida yiliga ikki marta tashkil etiladi. Nomzodlar bakalavriat, magistratura yoki doktorantura dasturlari bo‘yicha xorijiy universitetlarda o‘qish uchun ariza topshirishlari mumkin. Bakalavriat uchun stipendiya odatda uch-to‘rt yilgacha, magistratura uchun bir-ikki yilgacha, doktorantura yo‘nalishida esa uch-to‘rt yilgacha ajratiladi.
Stipendiya ta’lim jarayonida talab etiladigan asosiy xarajatlarni to‘liq qoplashga yo‘naltirilgan. Jumladan, o‘qish uchun shartnoma to‘lovlari, viza rasmiylashtirish, tibbiy sug‘urtalash, yo‘l xarajatlari, yashash hamda kunlik sarf-xarajatlar stipendiya hisobidan moliyalashtiriladi. Shuningdek, nomzodlarga zarur o‘quv adabiyotlarini xarid qilish uchun ham mablag‘ ajratiladi. Bu imkoniyat talabalarni xorijda bemalol o‘qishi va ilmiy faoliyatini davom ettirishi uchun keng sharoit yaratadi.
Tanlovda g‘oliblarni aniqlash jarayoni shaffof va ikki bosqichdan iborat. Dastlab nomzodlar maxsus test sinovlaridan o‘tadi, undan so‘ng suhbat jarayoni tashkil etiladi. Har ikki bosqich natijalari asosida eng munosib talabalar saralanadi. Stipendiya g‘oliblari ro‘yxati tanlov yakunlanganidan keyin bir oy muddatda e’lon qilinadi.
Stipendiatlarga sertifikatlar tantanali ravishda topshiriladi. Shuningdek, stipendiat, Jamg‘arma, ish beruvchi va moliyaviy kafillar o‘rtasida to‘rt tomonlama shartnoma tuziladi. Ushbu shartnoma stipendiyani rasmiylashtirish, ta’lim davomida majburiyatlarni bajarish va keyingi ish faoliyatini kafolatlashga xizmat qiladi.
“El-yurt umidi” stipendiyasi nafaqat chet elda o‘qish imkoniyatini beradi, balki yoshlarning intellektual salohiyatini ro‘yobga chiqarish, ularni xalqaro maydonda raqobatbardosh mutaxassis sifatida shakllantirishga xizmat qiladigan muhim dasturdir. Shu bois u mamlakatimizning inson kapitalini rivojlantirish yo‘lidagi eng strategik loyihalardan biri sifatida baholanadi.
Avvalroq Qaynoq24.uz O‘zbekistonda 14–18 yoshdagi o‘smirlar endi bank kartasini mustaqil ochishi mumkinligi haqida yozgan edi.
