AQSh prezidenti Donald Tramp Nyu-York shahrining saylangan meri Zohran Mamdani bilan juma kuni Oq uyda uchrashishini tasdiqladi. Bu haqda NDTV xabar bermoqda.
Tramp avvalroq Mamdani siyosatini keskin tanqid qilib, 4-noyabr kuni bo‘lib o‘tgan saylov arafasida uning g‘alabasi Nyu-York uchun iqtisodiy va ijtimoiy falokat bo‘lishi mumkinligidan ogohlantirgan edi.
“Nyu-Yorkning kommunist meri Zohran Mamdani uchrashuv so‘radi. Uchrashuv 21-noyabr, juma kuni Oq uyda bo‘ladi. Boshqa ma’lumotlar keyin e’lon qilinadi”, deb yozdi Tramp Truth Social’da.
Mamdani g‘alaba nutqida Trampni keskin tanqid qilgan. U Tramp immigratsiyaga qarshi siyosat yuritayotgan bir paytda Nyu-Yorkni aynan muhojirlar boshqarishi va rivojlantirishi haqida gapirgan.
“Agar kimdir Tramp tomonidan aldangan millatga uni qanday yengishni ko‘rsatishi mumkin bo‘lsa, bu – Trampning o‘zi ulg‘aygan shahar”, degan edi u.
Mamdani AQShning eng yirik shahri Nyu-York meri etib saylangan ilk Janubiy Osiyolik va ilk musulmon siyosatchi. U Respublikachi nomzod Kertis Sliva va mustaqil nomzod sifatida qatnashgan, Tramp tomonidan saylov arafasida qo‘llab-quvvatlangan sobiq Nyu-York gubernatori Endryu Kuomoni ortda qoldirdi.
Zohran Mamdani kinorejissyor Mira Nayr va Kolumbiya universiteti professori Mahmud Mamdani farzandi. U Ugandada tug‘ilgan, keyin 7 yoshida oilasi bilan Nyu-Yorkka ko‘chib kelgan. AQSh fuqaroligini esa faqat 2018-yilda olgan.
Avvalroq Qaynoq24.uz nashri Tramp Rossiyaga qarshi sanksiyalarni qo‘llab-quvvatlagani haqida yozgan edi.
