Indoneziyaning Shimoliy Sumatra provinsiyasida so‘nggi bir hafta davomida yog‘gan kuchli musson yomg‘irlari oqibatida yuz bergan suv toshqinlari va ko‘chkilar katta talafotlarga sabab bo‘ldi. Rasmiylarning ma’lum qilishicha, falokatda 300 dan ortiq kishi halok bo‘lgan, yana o‘nlab insonlar bedarak yo‘qolgan deb hisoblanmoqda.
Kuchli yog‘ingarchilik daryolarning toshib ketishiga, tog‘ yonbag‘irlarining qulashiga va butun qishloqlar suv ostida qolishiga olib keldi. Minglab uylar va binolar vayron bo‘lgan, ko‘plab hududlarda elektr va aloqa tizimlari ishdan chiqqani sababli qutqaruv ishlari qiyinlashmoqda.
Qutqaruvchilar yo‘llari vayron bo‘lgan, transport kira olmaydigan hududlarga yetib borish uchun kurashmoqda. Ba’zi mintaqalarda aloqa uzilgani sababli vaziyat bo‘yicha to‘liq ma’lumot olishning iloji yo‘q.
Indoneziya Milliy falokatlarni boshqarish agentligi rahbarining aytishicha, halok bo‘lganlar soni hozircha kamida 303 nafarga yetgan, ammo qutqaruv ishlari davom etayotgani bois bu raqam yanada oshishi mumkin.
Hodisa hududda qayd etilgan yer silkinishi bilan bir vaqtga to‘g‘ri kelgani tabiiy ofat miqyosini yanada og‘irlashtirdi. Rasmiylar jabrlanganlarga yordam ko‘rsatish va xavfli hududlardan aholini evakuatsiya qilish bo‘yicha shoshilinch choralar ko‘rayotganini bildirdi.
Qaynoq24.uz nashri Indoneziyada it va mushuk go‘shti savdosini taqiqlangani haqida yozgan edi.
