Hukumatning 3 dekabr kuni qabul qilingan 763-son qaroriga muvofiq, “Yagona milliy mehnat tizimi” — YMMT idoralararo dasturiy-apparat kompleksi orqali ish beruvchilarga tijoriy elektron xizmatlar ko‘rsatish bo‘yicha yangi ma’muriy reglament tasdiqlandi.
Reglamentga ko‘ra, ish beruvchilar mazkur tijoriy xizmatlardan istaklariga ko‘ra ixtiyoriy foydalanishi mumkin. Shu bilan birga, mehnat faoliyatiga oid ma’lumotlarni YMMT tizimiga ish beruvchining o‘zi tomonidan bepul kiritish imkoniyati saqlab qolinadi.
Yangi tartib doirasida YaMMT direksiyasi ish beruvchilarga bir nechta elektron xizmatlarni pullik asosda taklif qiladi. Ular orqali xodimlar bilan tuzilgan yoki bekor qilingan mehnat shartnomalari haqidagi ma’lumotlar elektron tarzda tizimga kiritiladi. Shuningdek, xodimlarning avvalgi ish joylariga oid ma’lumotlar asosida elektron mehnat daftarchasi shakllantiriladi. Tashkilotning ichki tuzilmasi ham YMMTda elektron ravishda rasmiylashtiriladi.
Tijoriy xizmatlardan foydalanish uchun talabgor YIDXP orqali ro‘yxatdan o‘tadi va maxsus so‘rovnomani to‘ldiradi. Ariza vakolatli organ tomonidan uch ish kuni davomida ko‘rib chiqiladi. Talabga mos hujjatlar taqdim etilgach, mehnat faoliyatiga oid elektron ma’lumotlar tizimda shakllantiriladi va QR-kodli ma’lumotnoma rasmiylashtiriladi.
Qaynoq24.uz 6 ming ayolning loyihalarini qo‘llab-quvvatlash uchun 2 trillion so‘m yo‘naltirilishi haqida yozgan edi.
