Honor kompaniyasi 26-dekabr kuni Xitoyda Honor Win va Win RT nomli yangi unumdorlikka yo‘naltirilgan flagman smartfonlarini taqdim etishga tayyorlanmoqda. Brend rasmiy posteri orqali Honor Win modelining protsessori va AnTuTu natijalarini ochiqladi.
Ma’lum bo‘lishicha, Honor Win Snapdragon 8 Elite Gen 5 chipseti bilan jihozlanadi. Qurilmada tezligi 10,7 Gbps gacha yetadigan LPDDR5x Ultra operativ xotira hamda UFS 4.1 ichki xotira ishlatiladi. Ushbu kombinatsiya smartfonga AnTuTu v10 testida 4 million 409 ming 382 ball to‘plash imkonini bergan.
Manbalarga ko‘ra, Honor Win 16 GB tezkor xotira va qo‘shimcha 16 GB virtual RAM bilan taqdim etiladi. Kompaniya bayonotida aytilishicha, qurilma og‘ir grafikaga ega o‘yinlarni besh soat davomida uzluksiz, kadrlar tushishi va kechikishlarsiz ishga tushira oladi.
Insayder Bald Panda bergan ma’lumotlarga ko‘ra, Honor Win 6,83 dyuymli OLED ekran bilan jihozlanadi. Displey 1,5K aniqlik va 185 Gts yangilanish chastotasini qo‘llab-quvvatlaydi. Ekran atrofidagi ramkalar esa to‘rt tomondan atigi 1,4 millimetrni tashkil etadi.
Yana bir insayder Digital Chat Station’ning xabar berishicha, Honor Win ulkan 10 000 mA/soat sig‘imli batareyaga ega bo‘ladi. Qurilma 100 vattli simli va 80 vattli simsiz tezkor quvvatlashni qo‘llab-quvvatlaydi. Honor Win RT modeli esa nisbatan arzonroq bo‘lib, Snapdragon 8 Elite chipi va 10 000 mA/soat batareya bilan taqdim etiladi, biroq unda simsiz quvvatlash funksiyasi bo‘lmaydi.
Kamera imkoniyatlariga to‘xtaladigan bo‘lsak, Honor Win 50 megapikselli uch kamerali tizim, jumladan telefoto modul bilan jihozlanadi. Win RT esa ikki kamerali asosiy blokka ega bo‘ladi. Har ikkala modelda ham samarali sovitish tizimi mavjud bo‘lib, uzoq yuklama vaqtida qizib ketishning oldi olinadi.
Honor Win seriyasi qora, oq va ko‘k rang variantlarida taqdim etilishi tasdiqlangan.
Qaynoq24.uz eng yaxshi kameraga ega Honor smartfonlari haqida yozgan edi.
