AQSh Venesuelada keng ko‘lamli harbiy amaliyot o‘tkazib, prezident Nikolas Maduro va uning rafiqasi Siliya Floresni qo‘lga oldi. Voqealar fonida Venesuelada favqulodda holat e’lon qilindi.
Boshlanishi
So‘nggi haftalarda AQSh prezidenti Donald Trump ma’muriyati Maduroga bosimni kuchaytirgan edi. Tramp Maduroga bir hafta oldin taslim bo‘lish taklifini bildirganini aytdi. AQSh tomoniga ko‘ra, harbiy operatsiya ob-havo sabab bir necha kunga kechiktirilgan.
Harbiy zarbalar
Operatsiya davomida Karakas va uning atrofidagi bir nechta strategik obyektlarga zarbalar berildi. Ular orasida La Karlota aviabazasi, La Guayra porti, Higuerote aeroporti va Fuerte Tiuna harbiy majmuasi bor. Karakas osmonida kuchli portlashlar va tutun ustunlari kuzatildi.
Maduroning qo‘lga olinishi
Trampning ma’lum qilishicha, Maduro mustahkam qo‘riqlanadigan, qal’aga o‘xshash joyda qo‘lga olingan. AQSh prezidenti operatsiya davomida o‘z tomonida halok bo‘lganlar yo‘qligini, faqat ayrim harbiylar yengil jarohat olganini bildirdi.
Ayblovlar va AQShga olib ketilishi
AQSh bosh prokurori Pam Bondi Maduro Nyu-Yorkda narkotik savdosi, qurol-yarog‘ va terrorchilik bilan bog‘liq ayblovlar bilan rasman ayblanganini e’lon qildi. U AQSh sudlarida javob berishi aytildi. Trampga ko‘ra, Maduro va uning rafiqasi Nyu-Yorkka olib ketilmoqda.
Venesuelaning javobi
Venesuela hukumati AQSh harakatlarini “o‘ta jiddiy harbiy tajovuz” deb atadi va milliy favqulodda holat joriy etdi. Ichki ishlar vaziri Diosdado Kabello aholiga tinchlikni saqlash chaqirig‘i bilan chiqdi. Karakasda dorixonalar va supermarketlar oldida navbatlar paydo bo‘ldi.
Xalqaro reaksiya
Kolumbiya chegaraga qo‘shin joylashtirdi. Chili va Kuba AQSh harakatlarini qoraladi. Buyuk Britaniya bosh vaziri mamlakat bu operatsiyada ishtirok etmaganini bildirdi.
Keyingi noaniqliklar
Maduro qo‘lga olinganidan so‘ng Venesuelani kim boshqarishi masalasi ochiq qolmoqda. Vitse-prezident Delsi Rodriges, ichki ishlar vaziri Diosdado Kabello va mudofaa vaziri Vladimir Padrino ehtimoliy asosiy figuratlar sifatida tilga olinmoqda. Mamlakatda siyosiy va ijtimoiy beqarorlik kuchayishi mumkinligi haqida xavotirlar bildirilmoqda.
Qaynoq24.uz nashri AQSh Venesuela sohillari yaqinida yana bir neft tankerini qo‘lga olgani haqida yozgan edi.
