Apple kelajakdagi iPhone modellari uchun 200 megapikselli asosiy kamerani sinovdan o‘tkazayotgani haqida yangi mish-mishlar paydo bo‘ldi. Bu haqda Gizmochina nashri ma’lum qildi.
Insayder Digital Chat Station ma’lumotiga ko‘ra, kompaniya hozirda 1/1.12 dyuymli yirik sensorni baholamoqda. Ushbu sensor ayni paytda Oppo Find X9 Ultra modelida ham qo‘llanishi kutilayotgani aytilmoqda.
Ma’lumotlarga ko‘ra, Apple 200 MP sensorni barcha kameralar uchun emas, faqat asosiy kamera sifatida sinovdan o‘tkazmoqda. Biroq bu hali ichki test bosqichi hisoblanadi va yakuniy iPhone modelida paydo bo‘lishi kafolatlanmagan. Apple odatda yangi texnologiyalarni uzoq sinovdan o‘tkazadi va faqat to‘liq tayyor bo‘lgandagina joriy qiladi.
Shu bilan birga, Android ishlab chiqaruvchilari allaqachon yuqori megapikselli kameralarni faol qo‘llamoqda. Masalan, Oppo yangi flagmanida ikkita 200 MP kamera bo‘lishi kutilmoqda. Qurilmada 200 MP asosiy kamera, 3x optik zoomli 200 MP periskop kamera, 10x optik zoomli yana bir periskop linza hamda 50 MP ultra-keng burchakli kamera bo‘lishi mumkin. Bundan tashqari, qurilma 20x “optik sifatli” zoom va 120x gacha raqamli zoomni qo‘llab-quvvatlashi aytilmoqda.
Apple esa odatda megapiksellarni oshirish o‘rniga hisoblash fotografiyasi (computational photography) texnologiyalariga tayanadi. Kompaniya kamera sifatini sun’iy intellekt, tasvirni qayta ishlash va sensor optimizatsiyasi orqali yaxshilashni afzal ko‘rib kelmoqda. Shu sababli 200 MP kamera Apple uchun odatiy strategiyadan biroz chekinish bo‘lishi mumkin.
Qaynoq24.uz Apple kompaniyasi Siri’ni chat-botga aylantirgani haqida yozgan edi.
