BYD kompaniyasining yangi BYD Da Han flagman sedani Xitoy ko‘chalarida kamuflyajsiz holatda ko‘rindi. Yaltiroq qizil rangdagi avtomobil yaqin vaqt ichida Xitoy bozoriga elektromobil va plagin-gibrid versiyalarda chiqarilishi kutilmoqda.
Da Han, shuningdek, Great Han nomi bilan ham tilga olinadi. Model BYD’ning Da Tang flagman yo‘ltanlamasi bilan bir platformada qurilgan. Avvalroq Da Tang sotuvoldi buyurtmalari ochilganidan keyin ikki haftaga yetmasdan 100 mingdan ortiq ariza qabul qilgan edi.
Yangi sedan ikkinchi avlod Blade akkumulyatori bilan jihozlanadi. Ishlab chiqaruvchi ma’lumotiga ko‘ra, batareyani 10 foizdan 97 foizgacha to‘qqiz daqiqada quvvatlash mumkin. Avtomobil orqa g‘ildiraklarni burish tizimi va faol osma bilan ham ta’minlanadi.
Sinovda ko‘rilgan Da Han qizil kuzov, oq old ustunlar va oq tom bilan ajralib turadi. Kuzov bo‘ylab xrom bezaklar, ko‘p spitsali yirik disklar va tik holatda qoladigan markaziy qopqoqlar o‘rnatilgan. Disk markazida Han — «汉» belgisi aks ettirilgan.
Sedanning tashqi ko‘rinishida yarim yashirin eshik tutqichlari, yaxlit orqa chiroq, xrom element bilan birlashtirilgan ingichka old faralar va faol havo kirish kanali mavjud. Tomga o‘rnatilgan LiDAR sensori avtomobil DiPilot 5.0 haydovchiga ko‘maklashish tizimiga ega bo‘lishini ko‘rsatadi. Ushbu tizim shahar yo‘llari va avtomagistrallarda Navigate on Autopilot funksiyasini qo‘llab-quvvatlaydi.
BYD Da Han’ning uzunligi 5256 mm, kengligi 1999 mm va balandligi 1510 mmni tashkil etadi. G‘ildirak bazasi 3130 mmga teng. Taqqoslash uchun, model standart Mercedes-Benz S-Class’dan 66 mm uzunroq.
Elektromobilning boshlang‘ich orqa yetakli versiyasiga 370 kVt yoki 496 ot kuchiga ega bitta motor o‘rnatiladi. To‘liq uzatmali variantning umumiy quvvati 570 kVtga, ya’ni 764 ot kuchiga yetadi. Orqa yetakli versiya bir quvvatlanishda 1008 km, to‘liq uzatmali model esa 880 km masofa bosib o‘tishi aytilmoqda.
Qaynoq24.uz BYD avtomobilida jiddiy muammo aniqlangani haqida yozgan edi.
