O‘zbekistonda korxonalarning katta qismi savdo sohasiga to‘g‘ri kelmoqda. Milliy statistika qo‘mitasi ma’lumotiga ko‘ra, 2026-yil 1-mart holatiga mamlakatda jami 576,8 mingta korxona va tashkilot faoliyat yuritmoqda.
Tahlillarga ko‘ra, eng katta ulush savdo sohasiga tegishli. Ushbu yo‘nalishda 156 mingdan ortiq korxona ishlamoqda. Bu umumiy ko‘rsatkichning qariyb to‘rtdan bir qismini tashkil etadi. Ikkinchi o‘rinda qishloq, o‘rmon va baliqchilik xo‘jaligi turibdi. Ushbu sohada 127 mingdan ortiq subyekt faoliyat yuritmoqda. Sanoat esa 61 mingdan ziyod korxona bilan uchinchi o‘rinni egallagan.
Qurilish va yashash hamda ovqatlanish xizmatlari sohalarida ham faoliyat yuqori. Har ikkala yo‘nalishda 31 mingdan ortiq korxona mavjud. Transport va saqlash xizmatlarida 17 mingdan ortiq, sog‘liqni saqlash va ijtimoiy xizmatlarda esa 14 mingdan ziyod tashkilot ishlamoqda. Axborot va aloqa sohasi 12 mingdan ortiq korxona bilan nisbatan kichik ulushga ega.
Qolgan 124 mingdan ortiq korxona boshqa yo‘nalishlarda faoliyat yuritmoqda.
Qaynoq24.uz yanvarda O‘zbekistonning tashqi savdo aylanmasi 5,8 mlrd dollarga yetgani haqida yozgan edi.
