Redmi yangi Redmi K90 Max smartfonining dizaynini ilk bor rasman namoyish etdi. Bu haqda Gizmochina nashri xabar bermoqda.
Qurilma Space Silver rangida taqdim etildi. Smartfon orqa panelida minimalistik va zamonaviy dizayn qo‘llanilgan. Alyuminiy ramka va sovuq tusli kumush rang qurilmaga premium ko‘rinish beradi. Old panel ko‘rsatilmagan bo‘lsa-da, u tekis ekran bilan kelishi kutilmoqda.
Eng katta yangilik sovitish tizimida namoyon bo‘ladi. Kamera modulida maxsus ventilyatsiya teshigi joylashgan. Pastki qismida esa keng havo chiqish yo‘li mavjud. Bu smartfonning o‘yinlarga mo‘ljallanganini ko‘rsatadi.
Ichki sovitish tizimi 18 mm dan katta ventilyator bilan jihozlangan. Bu esa havo aylanishini yaxshilaydi va yuqori yuklama paytida tezroq sovishini ta’minlaydi. Tizim plata qismlaridan alohida joylashtirilgan bo‘lib, mustahkamlik va chang hamda suvdan himoyani saqlab qoladi.
Texnik jihatdan qurilma ham kuchli bo‘lishi kutilmoqda. U 6,83 dyuymli OLED ekran, 1.5K aniqlik va 165 Hz yangilanish tezligiga ega bo‘lishi mumkin. Smartfon Dimensity 9500 protsessori bilan ishlashi taxmin qilinmoqda.
Batareya sig‘imi 8500 mAh bo‘lishi va 100 Vt tezkor zaryadlashni qo‘llab-quvvatlashi aytilmoqda. Bundan tashqari, ekranga o‘rnatilgan ultratovushli barmoq izi skaneri ham bo‘ladi. Audio tizim Bose sozlagan stereo karnaylar bilan jihozlanishi kutilmoqda. Qurilmada kuchli vibratsiya uchun X-o‘qli motor ham bo‘ladi.
Shuningdek, smartfon IP68 va IP69 darajasida chang va suvdan himoya bilan taqdim etilishi mumkin. Redmi K90 Max modeli asosan o‘yin ishqibozlari uchun mo‘ljallangan yuqori unumdor smartfon sifatida bozorga chiqishi kutilmoqda.
Qaynoq24.uz Redmi K100 smartfoni qanday imkoniyatlar bilan chiqishi haqida yozgan edi.
