BYD’ning Denza brendi yangi BYD Denza Z sport elektromobili uchun ilg‘or steer-by-wire, ya’ni mexanik ulanmasiz elektron rul boshqaruvi tizimini tayyorlamoqda. Bu haqda CNC xabar bermoqda.
Yangi tizim BYD’ning ichki muhandislik va komponentlar bo‘linmasi Fudi Technology tomonidan yaratilgan. Unda Fudi POR8 deb nomlangan maxsus rul motoridan foydalaniladi. Ushbu yechim klassik mexanik bog‘lanish o‘rniga avtomobil g‘ildiraklarini to‘liq elektron buyruqlar orqali boshqarishga imkon beradi.
Denza Z’da old o‘qda bitta motorli va bitta chulg‘amli rul boshqaruvi qo‘llangan. BYD bu yo‘l bilan Bosch va Nexteer kabi yirik yetkazib beruvchilar ishlatadigan ikki chulg‘amli motor sxemasidan voz kechgan. Kompaniya bunday arxitektura issiqlik yig‘ilishini kamaytirishi va old osma zonasida kamroq joy egallashini ta’kidlamoqda.
Tizim xavfsizligi BYD’ning markazlashtirilgan E³ platformasi orqali ta’minlanadi. Ushbu platforma avtomobil harakatini boshqarish, shassi, quvvat tizimi va elektron nazorat funksiyalarini birlashtiruvchi xavfsizlik tarmog‘i vazifasini bajaradi.
Denza Z’dagi steer-by-wire tizimi 0,1 daraja aniqlikda ishlashi aytilmoqda. Qayta ishlash tezligi esa an’anaviy mexanik rul tizimlariga qaraganda uch baravar yuqori bo‘lishi kutilmoqda. Old o‘qdagi bitta motorli sxema orqa o‘qda joylashgan ikkita mustaqil rul motorlari bilan to‘ldirilgan.
POR8 tizimi xavfsizlik bo‘yicha olti qatlamli zaxira arxitekturaga ega. Unda ikkita asosiy boshqaruv mikrochipi, mustaqil 12 V va 48 V quvvat zanjirlari, olti fazali motor holatini kuzatish tizimi, zaxira moment va burchak sensorlari, alohida dasturiy tizimlar hamda markaziy E³ shassi domen-kontrolleri orqali ishlaydigan favqulodda rejim nazorati mavjud.
BYD bu texnologiyani avvalo premium va yuqori unumdorlikka ega avtomobillarda qo‘llashni rejalashtirmoqda. Denza Z ushbu tizimni oladigan ilk modellardan biri bo‘ladi. Sportkar 1582 ot kuchiga ega bo‘lishi kutilmoqda va u Nyurburgringda superkar darajasidagi sinovlardan o‘tkazilgan.
Qaynoq24.uz BYD Tai 9 avtomobilini tayyorlayotgani haqida yozgan edi.
