AQShda mart oyida yillik inflatsiya 3,3 foizga yetdi. Bu fevraldagi 2,4 foizlik ko‘rsatkichdan keskin yuqori. Narxlar o‘sishiga asosiy sabab energetika bozoridagi inqiroz bo‘ldi.
10-aprel kuni e’lon qilingan ma’lumotlarga ko‘ra, vaziyatga Eron bilan bog‘liq keskinlik va dengiz qatnovidagi uzilishlar ta’sir qilgan. Ayniqsa Ho‘rmuz bo‘g‘ozidagi muammolar yonilg‘i narxlarini keskin oshirdi. Energiya narxlari yillik hisobda 12,5 foizga ko‘tarildi. Fevralda bu ko‘rsatkich atigi 0,5 foiz edi. Benzin narxi 18,9 foizga, mazut esa 44,2 foizga qimmatlashdi.
Mutaxassislar narxlar tez orada tushishini kutmayapti. Kompaniyalar odatda narxlarni tez oshiradi, ammo pasaytirishga shoshilmaydi. Shu sababli inflyatsion bosim yaqin oylar ichida ham saqlanib qolishi mumkin. Bazaviy inflatsiya 2,6 foizni tashkil etdi. Bu prognozdan biroz past bo‘lsa-da, umumiy bosim yuqori darajada qolmoqda. Xizmat ko‘rsatish sohasida ham narxlar oshmoqda.
Ta’minotlarni boshqarish instituti ma’lumotiga ko‘ra, xizmatlar sektorida narxlar indeksi 70,7 ga yetdi. Bu 2022-yil oktabrdan beri eng yuqori ko‘rsatkich hisoblanadi. Bu esa yaqin kelajakda narxlar yana oshishi mumkinligini anglatadi.
Federal zaxira tizimi murakkab vaziyatga tushdi. Inflatsiya yuqori darajada qolmoqda, mehnat bozori esa sekinlashmoqda. Regulyator stavkalarni pasaytirsa, inflatsiya yanada kuchayishi mumkin.
Qaynoq24.uz AQSh va Eron 2 haftalik sulhga kelishgani haqida yozgan edi.
