Toshkent shahri para yengil atletika bo‘yicha 2027-yilgi Jahon chempionatiga mezbon sifatida rasman tasdiqlandi. Bu haqda Milliy Paralimpiya qo‘mitasi ma’lum qildi.
Mazkur musobaqa O‘zbekiston va butun Markaziy Osiyo tarixida ilk bor o‘tkaziladi. Jahon birinchiligi 2027-yil iyun oyida poytaxtdagi “Olimpiya shaharchasi” hududida joylashgan “Olimpiya” stadionida bo‘lib o‘tadi. Turnir XIII para yengil atletika Jahon chempionati hisoblanadi.
Musobaqa Osiyo qit’asida beshinchi bor tashkil etiladi. Avvalgi yillarda Doha, Dubay, Kobe va Nyu-Dehli shaharlari mezbonlik qilgan. Toshkent-2027 turnirida 100 dan ortiq mamlakatdan 1 300 nafarga yaqin sportchi qatnashishi kutilmoqda. Bu uni mintaqa tarixidagi eng yirik para sport tadbiriga aylantiradi.
Chempionat dasturi Paralimpiya o‘yinlari formatiga mos ravishda shakllantiriladi. Bu esa musobaqaning sport va tashkilotchilik darajasini yuqori bosqichga olib chiqadi.
Qaynoq24.uz Sportni qo‘llab-quvvatlash jamg‘armasi tashkil etilishi haqida yozgan edi.
