Changan kompaniyasi Tailand bozorida Changan Nevo Q05 elektromobilini rasman sotuvga chiqardi. Model BYD Atto 2’ga raqib sifatida ko‘rilmoqda.
Avtomobil narxi 629,9 ming bahtdan 709,9 ming bahtgacha belgilangan. Bu taxminan $19,4 mingdan $21,8 minggacha degani. 30-iyungacha amal qiladigan maxsus taklif doirasida narx 599,9 ming bahtdan 679,9 ming bahtgacha tushiriladi. Bu $18,5 mingdan $20,9 minggacha bo‘lgan qiymatga teng.
Nevo Q05 Changan uchun global bozorlarga chiqishda muhim modellardan biri bo‘lishi kutilmoqda. Kompaniya avtomobilni iyun oyida O‘zbekiston bozoriga olib kirishni rejalashtirgan. Avgust oyida model Indoneziya, Markaziy va Janubiy Amerika bozorlariga chiqariladi. Oktabr oyida esa Yevropa mamlakatlari va mintaqalarida sotuv boshlanishi kutilmoqda.
Model Changan’ning “Digital Flying Wing 2.0” dizayn uslubida yaratilgan. Avtomobil old qismi yumaloq shakli, uzluksiz kunduzgi chiroqlar tasmasi va yopiq radiator panjarasi bilan ajralib turadi. LED faralar esa modelga zamonaviy ko‘rinish beradi.
Texnik imkoniyatlar
Nevo Q05 uzunligi 4435 mm, kengligi 1855 mm va balandligi 1600 mmni tashkil etadi. Ayrim talqinlarda balandlik 1595 mm deb ko‘rsatilgan. G‘ildirak bazasi 2735 mmga teng. Aerodinamik qarshilik koeffitsiyenti 0,265 Cdni tashkil qiladi.
Avtomobil besh xil kuzov rangida taklif etiladi. Ular orasida Pine Green, Gold Purple, Moon Silver, Cloud Grey va Cloud White ranglari bor. Salon o‘rama shakldagi dizaynga ega. Ichki makon Jade White yoki Ink Black ranglarida bo‘lishi mumkin. Model 14,6 dyuymli markaziy ekran va 10,17 dyuymli to‘liq LCD asboblar paneli bilan jihozlangan.
Multimedia tizimi CarPlay va HiCar texnologiyalarini qo‘llab-quvvatlaydi. Shuningdek, tizim Haier’ning aqlli uy qurilmalari bilan integratsiya qilinishi mumkin. Yukxona hajmi 540 litrni tashkil qiladi. Pol ostida qo‘shimcha 90 litrli bo‘lim ham mavjud. Orqa o‘rindiqlar buklanganda umumiy yuk hajmi 1380 litrgacha oshadi.
Changan Nevo Q05 120 kW quvvatga ega elektromotor bilan jihozlangan. Bu 161 hpga teng. Avtomobil 0 dan 100 km/soat tezlikka 8,2 soniyada chiqadi.
Xavfsizlik va qulaylik bo‘yicha Nevo Q05 L2 darajadagi haydovchiga yordam tizimlari bilan jihozlangan. Ular orasida adaptiv kruiz nazorati, yo‘lakda ushlab turish yordamchisi va avtomatik favqulodda tormozlash tizimi mavjud.
Qaynoq24.uz BYD 1800 km yura oladigan yangi krossoverini chiqarishi haqida yozgan edi.
