«O‘zavtosanoat» AJ matbuot xizmati Chevrolet Tracker 2026 avtomobilining mahalliy bozorda ishlab chiqarish yuzasidan Kursiv Uzbekistan nashriga izoh berdi.
«O‘zavtosanoat» AJ matbuot xizmatining «Kursiv» nashriga ma’lum qilishicha, hozirgi vaqtda yangi Chevrolet Tracker modelini O‘zbekistonda ishlab chiqarishni yo‘lga qo‘yish rejalashtirilmagan.
«Mazkur yo‘nalishda tegishli qarorlar qabul qilingan taqdirda, bu haqda jamiyatning rasmiy axborot resurslarida e’lon qilinadi», – deyiladi kompaniya sharhida.
Chevrolat Tracker 2026 o‘zi qanday model
2026-yilgi Chevrolet Tracker Chiliga yangilangan texnik ko‘rsatkichlar bilan kirib keladi. Krossover 1,2 litrli uch silindrli turbo dvigatel bilan jihozlangan. Ushbu motor 132 ot kuchi va 190 Nm aylanish momentini ishlab chiqaradi.
Dvigatel faqat 6 pog‘onali avtomatik uzatma bilan taklif etiladi. Mexanik quti variantlari mavjud emas. Yangilanishlar elektr rul boshqaruvi tizimiga ham tegishli. Rul yanada aniq va yengil ishlashi uchun optimallashtirilgan. Shuningdek, osma tizimi qayta sozlangan. Bu esa yo‘lda barqarorlik va qulaylikni oshiradi. Turbo tizimi ham yaxshilangan. Natijada avtomobil samaradorligi va yoqilg‘i tejamkorligi oshishi kutilmoqda.
Model Braziliyadagi San-Kaetano-du-Sul zavodida ishlab chiqariladi. Bu GM’ning ushbu model bo‘yicha asosiy ishlab chiqarish markazi hisoblanadi. Tracker oltita kuzov rangida taklif etiladi. Avtomobil 5 yil yoki 100 ming km kafolat bilan sotiladi.
Qaynoq24.uz Tracker narxi Rossiyada pasaygani haqida yozgan edi.
