Realme kompaniyasi yangi Realme Narzo 100 Lite 5G smartfonini 14-aprel kuni Hindistonda rasman taqdim etishini e’lon qildi. Model Narzo 80 Lite o‘rnini egallaydi va kompaniyaning arzon 5G segmentida joylashadi.
Yangi smartfonning eng katta yangiligi batareya bo‘ldi. Qurilmaga 7000 mA·soat sig‘imli batareya o‘rnatilgan. Kompaniya uni “Titan Battery” deb atamoqda. Realme ma’lumotiga ko‘ra, batareya sog‘lom ishlashini 6 yilgacha saqlab qoladi. Shuningdek, qurilmada reverse charging funksiyasi mavjud bo‘lib, u orqali boshqa qurilmalarni ham zaryadlash mumkin.
Smartfon MediaTek Dimensity 6300 protsessori bilan ishlaydi. Qurilmada 5300 mm² hajmli sovitish tizimi mavjud bo‘lib, u uzoq muddat barqaror ishlashni ta’minlaydi. Kompaniya qurilma kamida 4 yil davomida silliq ishlashini ta’kidlamoqda. Ekran ham e’tiborga loyiq. Narzo 100 Lite 5G 6,9 dyuymli LCD displey bilan jihozlangan. Yangilanish chastotasi 144 Hz bo‘lib, bu silliq skroll va o‘yin tajribasini ta’minlaydi. Maksimal yorqinlik 900 nitga yetadi.
Dizayn jihatidan smartfon Thunder Black va Frost Silver ranglarda taqdim etiladi. Orqa panel teksturali bo‘lib, vertikal kamera blokiga ega. Asosiy kamera 13 MP, old kamera esa 5 MP bo‘lishi kutilmoqda.Qurilma IP64 standartiga ega bo‘lib, chang va suv sachrashidan himoyalangan. Shuningdek, Armorshell himoya tizimi ham mavjud.
Xotira variantlari 4/64 GB, 4/128 GB va 6/128 GB bo‘lishi mumkin. Narx $160–$180 atrofida bo‘lishi kutilmoqda. Smartfon Amazon, Realme rasmiy sayti va do‘konlarda sotuvga chiqariladi.
Qaynoq24.uz Realme Narzo 100 Lite 5G smartfoni qanday xususiyatlar bilan chiqishi haqida yozgan edi.
