Kia Tasman avtomobili Rossiyadagi yirik dilerlik tarmog‘ida sotuvga chiqdi. Bu haqda Autonews nashri xabar bermoqda.
Avvalroq ushbu model faqat xususiy sotuvchilarning yakka takliflarida uchragan bo‘lsa, endi avtomobil «Rolf» dilerlik tarmog‘i orqali ham taklif etilmoqda. Model ikki xil komplektatsiyada sotilmoqda: X-Pro va Adventure.
X-Pro versiyasi 6,2 mln rubldan baholangan. Uning jihozlari qatoriga ikki zonali iqlim nazorati, raqamli asboblar paneli, 360 darajali kameralar, adaptiv kruiz-kontrol, Harman Kardon audiosistemasi va barcha o‘rindiqlarni isitish funksiyasi kiradi.
Qimmatroq Adventure komplektatsiyasi 6,49 mln rubl turadi. Unda yuqoridagilarga qo‘shimcha ravishda kuchaytirilgan old bamper, yon podnojkalar, orqa o‘rindiqlar ostida saqlash bo‘limi va adaptiv amortizatorlar mavjud.
Barcha versiyalar 2,5 litrli benzinli turbo dvigatel bilan jihozlangan. Motor 281 ot kuchi ishlab chiqaradi. U 8 pog‘onali avtomatik uzatmalar qutisi va to‘liq yuritma tizimi bilan birga ishlaydi.
Kia Tasman tashqi dizayni bilan bahsli model sifatida ko‘rilmoqda. Ayrim avtomobil nashrlari aynan shu omil uning Avstraliya kabi muhim bozorlardagi sust savdolariga sabab bo‘layotganini qayd etmoqda.
Global bozorda Kia Tasman’ning 2,2 litrli dizel dvigatelli versiyasi ham mavjud. Biroq bu modifikatsiya Rossiyaga yetkazib berilmayapti.
Qaynoq24.uz Kia Carnival avtomobilining baland tomli arzonroq versiyasi taqdim etilgani haqida yozgan edi.
