Honor kompaniyasi juda katta sig‘imli akkumulyatorga ega yangi smartfon tayyorlayotgani xabar qilindi. Digital Chat Station taxallusi bilan tanilgan insayderga ko‘ra, qurilma 14 000 mA/soatli batareya bilan jihozlanadi va hozirda New Product Introduction — yangi mahsulotni ishlab chiqarishga tayyorlash bosqichiga o‘tgan.
Bu bosqich qurilma konsept holatidan ommaviy ishlab chiqarishga yaqinlashayotganini anglatadi. Agar smartfon bozorga chiqsa, u akkumulyator sig‘imi bo‘yicha aksariyat flagman modellardan sezilarli darajada ustun bo‘ladi. Taqqoslash uchun, bu ko‘rsatkich iPhone 17 Pro‘dagi 4 252 mA/soatli batareyadan qariyb uch baravar katta.
Shunga qaramay, xabarlarga ko‘ra, qurilmaning og‘irligi taxminan 220 gramm atrofida bo‘ladi. Bu oddiy smartfonlar uchun og‘irroq ko‘rsatkich hisoblanadi, ammo 14 000 mA/soatli akkumulyator hisobga olinsa, nisbatan maqbul natija sanaladi.
Honor katta batareyali smartfonlar yo‘nalishini davom ettirmoqda
Honor so‘nggi vaqtlarda katta sig‘imli akkumulyatorga ega qurilmalar bilan faol tajriba o‘tkazmoqda. Kompaniyaning Win Turbo modeli yil boshida 10 000 mA·soat chegarasidan o‘tgan edi. Shuningdek, yaqinda taqdim etilgan Honor X80 Pro Max 11 000 mA/soatli akkumulyator, Snapdragon 6 Gen 5 chipi va 10 000 nit yorqinlikdagi displey bilan chiqarildi.
Ma’lumotlarga ko‘ra, Honor X80 Pro Max uzluksiz translyatsiya rejimida 26 soatdan ortiq ishlay olgan. 14 000 mA/soatli yangi model esa avtonom ishlash vaqtini yanada oshirishi mumkin.
Huawei ham shunga o‘xshash qurilma tayyorlamoqda
Insayderning ta’kidlashicha, Huawei ham juda katta sig‘imli akkumulyatorga ega smartfon ustida ishlamoqda. Unga sun’iy yo‘ldosh aloqasi va qat’iy energiya tejash rejimi qo‘shilishi kutilmoqda.
Hozircha Honor’ning 14 000 mA/soatli smartfoni qaysi seriyaga kirishi yoki qachon rasman taqdim etilishi noma’lum. Biroq ishlab chiqaruvchilar katta sig‘imli akkumulyatorlarni odatiy smartfon korpusiga joylashtirish yo‘lini topayotgan bir paytda, tashqi powerbank olib yurish ehtiyoji asta-sekin kamayishi mumkin.
Qaynoq24.uz Honor X80 Pro Max smartfoni haqida yozgan edi.
