Samsung Galaxy S27 seriyasi kompaniyaning so‘nggi yillardagi eng yirik dizayn o‘zgarishlaridan birini olishi mumkin. Yangi ma’lumotlarga ko‘ra, smartfonlar orqa qismidagi kameralar joylashuvi qayta ishlanadi.
Insayderlar, jumladan Ice Universe va Janubiy Koreyadagi Naver manbalari Galaxy S27 Ultra gorizontal kamera paneliga ega bo‘lishini bildirmoqda. Bu panel kapsula shaklida bo‘lib, Google Pixel smartfonlaridagi yechimni eslatadi.
Samsung oxirgi yillarda Galaxy S22 seriyasidan beri vertikal kamera joylashuvidan foydalanib kelayotgan edi. Galaxy S27 seriyasida esa bu yondashuv o‘zgarishi mumkin. Ma’lumotlarga ko‘ra, o‘zgarish faqat dizayn uchun emas, balki texnik sabab bilan bog‘liq. Samsung yangi smartfonlarda Qi2 magnitli simsiz quvvatlash tizimini joylashtirishni rejalashtirmoqda.
Qi2 tizimi uchun quvvatlash g‘altagi atrofida aylana shaklidagi magnit halqa kerak bo‘ladi. Hozirgi vertikal kamera bloki esa aynan shu joyni egallaydi. Shu sababli Samsung kameralarni boshqa joyga ko‘chirishga qaror qilgan bo‘lishi mumkin.
Galaxy S27 Ultra uchun tarqalgan konseptda orqa panelning yuqori qismi bo‘ylab gorizontal qora kamera paneli aks etgan. Bu yechim smartfonga yangi ko‘rinish berish bilan birga, Qi2 magnit halqasi uchun joy ochadi.
Yana bir muhim o‘zgarish akkumulyator bilan bog‘liq bo‘lishi mumkin. Manbalarga ko‘ra, Samsung Galaxy S27 Ultra uchun kremniy-uglerodli batareyalarni sinovdan o‘tkazmoqda.
Sinovdagi akkumulyator sig‘imlari 12 000 mAh, 18 000 mAh va 20 000 mAh atrofida ekani aytilmoqda. Bu Galaxy S26 Ultra’dagi 5000 mAh batareyaga nisbatan juda katta sakrash bo‘lishi mumkin. Kremniy-uglerodli batareyalar smartfonlarda kattaroq sig‘imni nisbatan ixcham shaklda joylashtirish imkonini beradi. Bunday texnologiyadan Xiaomi, OnePlus va Honor kabi brendlar allaqachon foydalanmoqda.
Galaxy S27 Ultra kamerasi ham sezilarli yangilanishi mumkin. Ma’lumotlarga ko‘ra, smartfon yangi 200 MP asosiy kamera bilan jihozlanadi. U Samsung‘ning ISOCELL HPA sensoriga asoslanishi mumkin.
Sensor o‘lchami 1/1,12 dyuym bo‘lishi aytilmoqda. Bu Sony LYT-901 sensori bilan bir xil darajadagi o‘lcham hisoblanadi.
Galaxy S27 Ultra’da o‘zgaruvchan diafragma ham qaytishi mumkin. Samsung bu texnologiyadan avval Galaxy S9 seriyasida foydalangan edi. Keyinchalik u flagman modellardan olib tashlangan. O‘zgaruvchan diafragma kamera linzasiga yorug‘lik sharoitiga qarab f-stop qiymatini moslashtirish imkonini beradi. Bu past yorug‘likda ko‘proq nur qabul qilish va kadr chuqurligini yaxshiroq boshqarishga yordam beradi.
Manbalar Galaxy S27 Ultra’da 3x telefoto kamera olib tashlanishi mumkinligini ham aytmoqda. Uning o‘rniga kuchliroq asosiy kamera va uzoq masofali periskop modulga urg‘u berilishi kutilmoqda. Galaxy S27 seriyasi to‘rtta modeldan iborat bo‘lishi mumkin. Ular Galaxy S27, Galaxy S27 Plus, Galaxy S27 Pro va Galaxy S27 Ultra nomlari bilan chiqishi aytilmoqda.
Galaxy S27 Pro modeli taxminan 6,47 dyuymli ekranga ega bo‘ladi. U asosiy va ultrakeng kamera sensorlari bo‘yicha Ultra versiyasiga yaqin bo‘lishi mumkin. Asosiy farq telefoto kamera va S Pen qo‘llab-quvvatlash masalasida bo‘ladi.
Ma’lumotlarga ko‘ra, Galaxy S27 Pro S Pen’ga ega bo‘lmaydi. U kompakt o‘lchamdagi premium smartfon sifatida joylashtirilishi mumkin.
Galaxy S27 seriyasining taqdimoti 2027 yil yanvar oyida o‘tkazilishi kutilmoqda. Hozircha Samsung bu ma’lumotlarni rasman tasdiqlamagan.
Qaynoq24.uz Samsung smartfonlarida eng ko‘p uchraydigan muammolar haqida yozgan edi.
