Vivo kompaniyasining Vivo X500 seriyasi haqida yangi ma’lumotlar tarqaldi. Kutilishicha, yangi qator uchta smartfondan iborat bo‘ladi.
Hozircha modellarning aniq nomlari rasman tasdiqlanmagan. Biroq ular Vivo X500, X500 Pro yoki X500 Pro Mini hamda X500 Pro Max nomlari bilan chiqishi mumkin. Insayder Digital Chat Station Weibo tarmog‘ida Vivo X500 Pro‘ning chipi va kamerasi haqida ma’lumot berdi. Unga ko‘ra, smartfon MediaTek’ning yangi avlod 2 nm Dimensity 9600 seriyali chipida sinovdan o‘tkazilmoqda.
Vivo X500 Pro yil oxirida chiqishi kutilayotgan ixcham flagmanlardan biri bo‘lishi mumkin. Qurilma yuqori unumdorlik va nisbatan kichik ekranli korpus bilan ajralib turadi. Muhandislik namunasi haqidagi ma’lumotlarga ko‘ra, Vivo X500 Pro 50 MP asosiy kamera bilan jihozlanadi. Unda 1/1,28 dyuymli yirik sensor va LOFIC texnologiyasi qo‘llanishi aytilmoqda.
Smartfonda 50 MP keng burchakli kamera ham bo‘ladi. Bundan tashqari, 64 MP periskop telekamera o‘rnatilishi mumkin. U taxminan 3 karra optik yaqinlashtirish imkoniyatini beradi. Avvaliga ushbu 64 MP modul OmniVision OV64B sensori bo‘lishi mumkinligi taxmin qilingan edi. Biroq Digital Chat Station ma’lumotiga ko‘ra, Vivo X500 Pro periskop kamerasi Sony’ning yangi IMX06H sensoridan foydalanadi.
Bu esa 200 MP kamera X500 seriyasida faqat Vivo X500 Pro Max modeliga berilishi mumkinligini anglatadi. Ushbu sensor Pro Max’da periskop telekamera sifatida ishlatilishi kutilmoqda. Boshqa ma’lumotlarga ko‘ra, Vivo X500 Pro 6,37 dyuymli yassi OLED LTPO ekran bilan jihozlanadi. Displey 1,5K aniqlikni qo‘llab-quvvatlaydi.
Smartfon 7 000 mA/soatdan katta akkumulyatorga ega bo‘lishi mumkin. Yangi avlod flagmani sifatida qurilma Android 17 asosidagi OriginOS 7 tizimi bilan chiqishi kutilmoqda.
Qaynoq24.uz Vivo Y600 Turbo smartfoni oldindan buyurtmaga chiqqani haqida yozgan edi.
