Samsung keyingi Galaxy S flagmanlarida kamera tizimini sezilarli yangilashi mumkin. GalaxyClub ma’lumotlariga ko‘ra, Samsung Galaxy S27 Pro va Galaxy S27 Ultra modellarida 16 megapikselli old kamera qo‘llanadi. Bu Samsung so‘nggi yillarda ishlatib kelayotgan 12 megapikselli selfi kameradan yuqoriroq ko‘rsatkich hisoblanadi.
Hozircha bazaviy Galaxy S27 va Galaxy S27+ modellarida ham yangi 16 megapikselli sensor bo‘lish-bo‘lmasligi tasdiqlanmagan. Biroq Samsung ushbu modellarda hozirgi 12 megapikselli old kamerani saqlab qolishi mumkin. Kompaniya 12 megapikselli selfi kamerani ilk bor 2023-yilda Galaxy S23 seriyasi bilan joriy qilgan edi.
Yangi 16 megapikselli kamera Samsung‘ning old kamera yondashuvida muhim o‘zgarish bo‘lishi mumkin. Mish-mishlarga ko‘ra, kompaniya iPhone 17 seriyasidagi 18 megapikselli old kameraga o‘xshash kvadrat sensordan foydalanishi ehtimoldan xoli emas. Bunday sensor oddiy to‘rtburchak sensordan farqli ravishda bir kadrdan ham portret, ham albom formatidagi suratni kesib olish imkonini beradi. Ya’ni foydalanuvchi telefonni qanday ushlab turganidan qat’i nazar, kamera kerakli orientatsiyada surat yaratishi mumkin.
Texnik jihatdan ham 16 megapikselli kvadrat sensor Samsung uchun mantiqli yechim bo‘lishi mumkin. Bunday sensor orqali kompaniya to‘liq kadrdan standart 12 megapikselli 4:3 formatdagi tasvirlarni istalgan yo‘nalishda kesib olishi mumkin. Shunga qaramay, hozircha bu faqat taxmin bo‘lib, rasmiy tasdiq mavjud emas.
Galaxy S27 seriyasida kutilayotgan yagona kamera yangilanishi old kamera bilan cheklanmasligi aytilmoqda. Avvalgi xabarlarda Galaxy S27 Pro modeli yangi 50 megapikselli 3,5 karra yaqinlashtiruvchi telefoto kameraga ega bo‘lishi mumkinligi aytilgan edi. Galaxy S27 Ultra esa alohida 3 karra telefoto kameradan voz kechishi mumkinligi haqida ham mish-mishlar bor.
Galaxy S27 seriyasining kamera imkoniyatlari va boshqa texnik xususiyatlari haqida yaqin oylarda ko‘proq ma’lumotlar paydo bo‘lishi kutilmoqda.
Qaynoq24.uz Samsung Galaxy S26 Ultra va Galaxy S25 Ultra akkumulyatori solishtirilgani haqida yozgan edi.
