Redmi Note seriyasi global savdolari 12 yil ichida 500 mln donaga yetdi. Bu haqda Gizchina nashri xabar bermoqda.
Birinchi Redmi Note modeli 2014-yilda taqdim etilgan. Shundan beri seriya jahon bozorida o‘rta narx segmentidagi eng ommabop smartfon liniyalaridan biriga aylandi. 500 mln dona sotuv natijasi o‘rtacha hisobda yiliga 41 mln donadan ortiq smartfon sotilganini anglatadi.
Redmi Note liniyasi yillar davomida katta ekran, sig‘imli akkumulyator, raqobatbardosh narx va kundalik foydalanish uchun yetarli texnik imkoniyatlari bilan xaridorlar e’tiborini tortib kelmoqda. Kompaniya yangi avlod taqdimotini aynan ushbu yirik savdo ko‘rsatkichi fonida e’lon qilib, Note 17 seriyasiga qiziqishni kuchaytirmoqda.
Yana bir muhim jihat — Redmi Note 16 modeli chiqarilmaydi. Kompaniya to‘g‘ridan-to‘g‘ri Note 17 nomiga o‘tmoqda. Bu qaror Redmi Note seriyasi raqamlarini Xiaomi’ning asosiy flagman liniyasi bilan moslashtirishga qaratilgan. Xiaomi 17 seriyasi shu yil boshida taqdim etilgan edi.
Norasmiy ma’lumotlarga ko‘ra, Redmi Note 17 seriyasi uchta modeldan iborat bo‘lishi mumkin: Note 17, Note 17 Pro va Note 17 Pro Max. Insayderlar standart model 6,83 dyuymli 1,5K OLED ekran, Snapdragon 6s Gen 4 chipi va 67 vattli quvvatlashga ega bo‘lishini taxmin qilmoqda.
Redmi Note 17 Pro modeli Snapdragon 6 Gen 5 protsessori va 9 000 mA·soat akkumulyator bilan chiqishi mumkin. Note 17 Pro Max esa MediaTek Dimensity 7500 chipi, 10 100 mA·soat batareya va 200 megapikselli asosiy kamera bilan jihozlanishi haqida xabarlar bor.
Qaynoq24.uz Redmi K90 Ultra smartfoni haqida yozgan edi.
