AQSH harbiylari Hormuz bo‘g‘ozida uchta tijorat kemasiga qilingan hujumlardan so‘ng Eron hududiga yangi aviazarbalar berdi. Eron janubida bir nechta kuchli portlashlar qayd etilgan, biroq hozircha qurbonlar haqida ma’lumot berilmagan.
AQSH Markaziy qo‘mondonligi — CENTCOM ma’lumotiga ko‘ra, zarbalar xalqaro suv yo‘lida harakatlanayotgan va tinch fuqarolar boshqaruvidagi savdo kemalariga hujum qilganlik uchun Eronga “katta yo‘qotishlar yetkazish” maqsadida amalga oshirilgan. Qo‘mondonlik Eronning harakatlarini asossiz, xavfli va amaldagi sulh kelishuvining ochiq buzilishi deb baholadi.
AQSH rasmiysiga tayanib tarqalgan ma’lumotlarga ko‘ra, hujumlar Eronning havo hujumidan mudofaa tizimlari, kemalarga qarshi qanotli raketalar va uchuvchisiz qurilmalarni uchirish maydonlariga qaratilgan. Ayrim xabarlarda bu galgi zarbalar AQSH tomonidan taxminan bir yarim hafta avval amalga oshirilgan hujumlardan to‘rt-besh baravar kuchli bo‘lgani qayd etilgan.
Eron ommaviy axborot vositalari mamlakat janubidagi Qeshm oroli, Sirik shahri va Bandar-Abbos portida portlash ovozlari eshitilganini ma’lum qildi. Sirikda kamida yettita portlash qayd etilgani aytilmoqda. Hujum oqibatlari va zarar ko‘lami bo‘yicha rasmiy ma’lumotlar hozircha e’lon qilinmagan.
Eron Tashqi ishlar vazirligi AQSH zarbalariga javoban Vashingtonni o‘zaro anglashuv memorandumini takroran buzishda aybladi. Vazirlik bayonotida Tehron AQSH harakatlarining oqibatlari haqida jiddiy ogohlantirishi hamda o‘z manfaatlari va milliy xavfsizligini himoya qilish uchun qat’iy choralar ko‘rishi ta’kidlangan.
AQSH zarbalari ikki davlat o‘rtasida o‘tgan oy imzolangan memorandum asosidagi 60 kunlik sulh davrida amalga oshirildi. Bu esa kelishuvning kelajagi va AQSH–Eron qarama-qarshiligining yana keng ko‘lamli harbiy to‘qnashuvga aylanishi ehtimoli borasidagi xavotirlarni kuchaytirdi.
Vaziyat AQSH prezidenti Donald Tramp Turkiyada o‘tayotgan NATO sammitida qatnashayotgan bir paytda keskinlashdi. Sammit doirasida u Turkiya prezidenti Rajab Toyyib Erdo‘g‘an bilan ham muzokara o‘tkazgan. Hormuz bo‘g‘ozidagi taranglik esa global savdo va neft tashuvlari uchun asosiy yo‘nalishlardan biridagi xavflarni yana oshirdi.
Qaynoq24.uz Medvedev AQSh bilan urushni Eron uchun «eng og‘ir sinov» deb atagani haqida yozgan edi.
