Vivo kompaniyasi hali rasman e’lon qilmagan Vivo S2 smartfonining dizayni internetda tarqalgan suratlarda namoyon bo‘ldi. Bu haqda Gizmochina nashri xabar berdi.
Ijtimoiy tarmoqlarda e’lon qilingan tasvirlarda Vivo S2 maketi qora va pushti-oltin ranglarda ko‘rsatilgan. Smartfonning orqa paneli xira qoplamaga ega bo‘lib, kameralar bloki korpusning yuqori chap burchagiga vertikal shaklda joylashtirilgan. Qora rangdagi qurilmaga yopishtirilgan yorliqda model nomi Vivo S2 ekani qayd etilgan.
Kameralar modulining yuqori qismida bir-biriga yaqin joylashtirilgan ikkita dumaloq obyektiv mavjud. Ulardan pastroqda esa yorug‘lik halqasi bilan o‘ralgan uchinchi dumaloq element joylashgan. Hozircha uning alohida kamera sensori yoki qo‘shimcha yoritish elementi ekani rasman tasdiqlanmagan.
Dastlabki ma’lumotlarga ko‘ra, Vivo S2 MediaTek Dimensity 7360 protsessori bilan jihozlanadi. Smartfon optik barqarorlashtirish tizimiga ega 50 Mp asosiy kamera va 8 Mp ultra keng burchakli kamerani olishi mumkin. Qurilmaga 1,5K aniqlikdagi, tasvirni 120 Hz chastotada yangilaydigan AMOLED ekran o‘rnatilishi ham aytilmoqda.
Avvalroq Vivo S2 V2576 model raqami bilan IMEI ma’lumotlar bazasida paydo bo‘lgan edi. Yangi qurilma Vivo‘ning S turkumini uzoq tanaffusdan so‘ng Hindiston bozoriga qaytarishi kutilayotgani bilan ham ahamiyatli. Mazkur turkumning Hindistonga qaytishi haqidagi dastlabki ma’lumotlar 2026-yil may oyida tarqalgan.
Manbalarga ko‘ra, Vivo S2 avgust oyining boshida taqdim etilishi, savdolar esa oyning o‘rtalarida boshlanishi mumkin. Smartfon yuqori o‘rta narx segmentidan joy olishi va Oppo Reno 16 Pro kabi qurilmalar bilan raqobatlashishi kutilmoqda.
Qaynoq24.uz Vivo X300 E smartfoni 7 200 mA/soat batareya bilan chiqishi haqida yozgan edi.
