Vivo kompaniyasi hali taqdim etilmagan Vivo X500 Ultra flagman smartfoni uchun kameralar tizimini yakuniy tasdiqlamagan. Bu haqda Gizmochina xabar berdi.
Digital Chat Station taxallusi bilan tanilgan insayder ma’lumotiga ko‘ra, ishlab chiqaruvchi qurilmaning periskop telefoto kamerasi uchun uch xil 200 megapikselli sensorni sinovdan o‘tkazmoqda.
Vivo muhandislari hozirda o‘lchami 1/1,12 dyuym, 1/1,3 dyuym va 1/1,4 dyuym bo‘lgan sensorlarni taqqoslamoqda. Ularning barchasi uzoq masofadagi obyektlarni suratga olishga mo‘ljallangan periskop telefoto kamerada qo‘llanishi mumkin.
Variantlar orasidagi eng katta 1/1,12 dyuymli sensor telefoto suratga olish imkoniyatlarini maksimal darajada kuchaytirishga qaratilgan yechim sifatida ko‘rilmoqda. Kattaroq sensor ko‘proq yorug‘lik qabul qilishi sababli ayniqsa kechasi, yopiq joylarda va uzoq fokus masofasida sifatliroq tasvir olish imkonini berishi mumkin. Shuningdek, u tafsilotlarni yaxshiroq saqlash va tasvirdagi shovqinni kamaytirishga yordam beradi.
Biroq katta sensorning qo‘llanishi kamera modulini murakkablashtiradi va smartfon korpusida ko‘proq joy talab qiladi. Bu esa qurilmaning qalinligi, kamera blokining o‘lchami va umumiy dizayniga ta’sir ko‘rsatishi mumkin. Shu sababli Vivo 1/1,3 dyuymli va 1/1,4 dyuymli sensorlarni ham muvozanatliroq yechim sifatida ko‘rib chiqmoqda.
Kichikroq sensorlar kamera imkoniyatlari, smartfon qalinligi va ichki qismlarning joylashuvi o‘rtasida yaxshiroq muvozanat yaratishi mumkin. Hozircha Vivo qaysi sensorni tanlashi noma’lum. Insayderning ta’kidlashicha, kompaniya har bir variantning kuchli va zaif tomonlarini batafsil solishtirmoqda.
Avvalroq Vivo X500 Ultra uchun alohida 10 karra optik yaqinlashtirishga ega periskop kamera yaratishni rejalashtirgani haqida xabarlar tarqalgan edi. Biroq iyun oyidagi ma’lumotlarga ko‘ra, kompaniya 10x telefoto obyektivli tajriba namunasidan voz kechgan.
Vivo uning o‘rniga bitta 200 megapikselli periskop kameradan foydalanishni rejalashtirayotgani aytilmoqda. Yuqori aniqlikdagi sensor ichki yaqinlashtirish texnologiyasi bilan birgalikda ishlaydi.
Qaynoq24.uz Vivo V80 7200 mA/soatli batareya bilan avgustda taqdim etilishi mumkinligi haqida yozgan edi.
