Kanadada davom etayotgan 800 dan ortiq o‘rmon yong‘ini mamlakatning o‘zi bilan birga AQSHning shimoliy hududlarida ham havo sifatini keskin yomonlashtirdi. Qalin tutun Detroyt, Toronto, Nyu-York, Chikago va Yangi Angliyaning ayrim shaharlarini qopladi. Rasmiylar aholini ko‘chada uzoq qolmaslikka chaqirmoqda.
Kanada yovvoyi tabiat yong‘inlari axborot tizimiga ko‘ra, mamlakatda 858 ta faol yong‘in qayd etilgan. Ularning 30 tasi bir sutka ichida boshlangan, aksariyati esa nazoratga olinmagan. Eng yirik o‘choqlar Ontarioning shimoli-g‘arbida joylashgan bo‘lib, shamol tutunni AQSH tomon olib ketmoqda.
Chikago, Grand-Rapids, Pitsburg va Toledo shaharlarida xavfli havo sifati haqida ogohlantirish e’lon qilindi. Bolalar oromgohlaridagi tadbirlar va ochiq osmon ostidagi konsertlar bekor qilindi, ayrim plyajlar yopildi. Nyu-York gubernatori Keti Xokul vaziyatni jiddiy sog‘liqni saqlash muammosi deb atadi. Shaharda sovitish markazlari ochilib, KN95 niqoblari tarqatilmoqda.
Ontariodagi yong‘inlar mahalliy tub aholi yashaydigan hududlarga ham zarar yetkazdi. Namaygoosisagagun jamoasi rahbari Helen Paavolaning aytishicha, ayrim uylar butunlay yonib ketgan. Kanada bosh vaziri Mark Karni federal hukumat viloyatlar va mahalliy jamoalar bilan hamkorlik qilayotganini bildirdi. Mutaxassislar yong‘inlar ko‘payishini iqlim isishi va qurg‘oqchilik bilan bog‘lamoqda.
Qaynoq24.uz AQSh harbiylari Erondagi 140 ta harbiy obyektga zarba bergani haqida yozgan edi.
