O‘zbekiston Respublikasi Prezidenti Shavkat Mirziyoyev 4-noyabr kuni AQSh Prezidenti Donald Trampning taklifiga binoan amaliy tashrif bilan Vashington shahriga bordi. Bu haqda prezident matbuot xizmati xabar bermoqda.
Davlat rahbarini “Endryus” aviabazasida AQSh Davlat kotibining o‘rinbosari Kristofer Landau, AQSh–O‘zbekiston savdo palatasi raisi Kerolin Lemm hamda boshqa rasmiylar kutib oldi.
Tashrif doirasidagi asosiy tadbirlar 5–6-noyabr kunlari bo‘lib o‘tadi. Prezident Mirziyoyev Amerika Qo‘shma Shtatlari Prezidenti Donald Tramp bilan uchrashadi, shuningdek, Markaziy Osiyo mamlakatlari va AQSh yetakchilarining “S5+1” formatidagi sammitida ishtirok etadi.
Dasturdan AQSh Kongressi va hukumat vakillari bilan uchrashuvlar, mamlakatning yetakchi kompaniyalari rahbarlari bilan muzokaralar hamda ishbilarmon doiralar ishtirokidagi davra suhbati ham o‘rin olgan.
Shuningdek, Vashingtonda Prezident Shavkat Mirziyoyevni AQShda ishlayotgan va ta’lim olayotgan o‘zbekistonliklar kutib oldi. Davlat rahbari ular bilan samimiy suhbatlashib, yurtimiz farzandlariga o‘qish va mehnatda yuksak muvaffaqiyatlar tiladi.
