Samsung kompaniyasining kelasi yil taqdim etilishi kutilayotgan Samsung Galaxy S26 smartfonlari haqida yangi ma’lumotlar paydo bo‘ldi.
Eng qiziqarli jihati — smartfonlarning o‘zi emas, balki ular bilan birga taqdim etiladigan yangi aksessuarlar bo‘lishi mumkin. Roland Quandt tomonidan tarqatilgan ma’lumotlarga ko‘ra, Samsung nihoyat Qi2 simsiz quvvatlash standartiga to‘liq o‘tmoqda va magnit tizimi asosidagi ekotizimni shakllantirishga jiddiy kirishgan.
Galaxy S26 seriyasi Qi2 bilan keladi
Insayder ma’lumotiga ko‘ra, Galaxy S26, S26 Plus va S26 Ultra modellarining barchasi Qi2 standarti bilan ishlaydi. Bu qaror mantiqan to‘g‘ri — yangi seriya 2026-yil fevral oxirida taqdim etilishi kutilmoqda.
Eng katta o‘zgarish — S26 Ultra modelida simsiz quvvatlash tezligining 25 Vt darajasiga oshirilishi. Bu S25 seriyasidagi 15 Vt bilan solishtirganda sezilarli sakrash bo‘lib, simsiz quvvatlashni ancha amaliy va tezkor qiladi.
Magnitli aksessuarlar ekotizimi shakllanmoqda
Leakda eng e’tiborli jihat — yangi magnitli aksessuarlar bo‘yicha Samsungning rejasi.
Ma’lumotlarga ko‘ra, kompaniya rasmiy himoya qoplamalarining aksar qismiga magnit halqalar joylashtiradi. Ular quyidagi turdagi g‘iloflarda bo‘ladi:
- Magnetic Clear
- Magnetic Carbon
- Magnetic Rugged
- Magnetic Silicon (qora va kulrang ranglarda)
Bu g‘iloflar Qi2 aksessuarlariga mos ravishda “snap” tarzida yopishishini ta’minlaydi — Apple’ning MagSafe tizimiga o‘xshash.
Yangi powerbank va 25 Vt Qi2 zaryadlovchi
Yana ikki aksessuar haqida ham dastlabki ma’lumotlar bor:
- magnitli simsiz powerbank — Wireless Power Consortium ro‘yxatida paydo bo‘lgan;
- 25 Vt quvvat beruvchi Qi2 zaryadlovchi (EP-P2900 modeli).
- Ular Galaxy S26 seriyasining yangi zaryadlash imkoniyatlariga moslashtirilgan bo‘ladi.
S26 Ultra uchun maxsus halqa ushlagich
Leakda yana bir aksessuar tilga olingan — Dual Magnet Ring Holder. U Bluetooth S Pen bilan ishlovchi modellar, ya’ni Galaxy S26 Ultra uchun mo‘ljallangan. Aksessuar qo‘l ushlagich yoki qo‘llab turuvchi stend vazifasini bajarishi mumkin — rasm chizadigan yoki ko‘p yozadigan foydalanuvchilar uchun qulaylik yaratadi.
Qaynoq24.uz Samsung Galaxy S25 FE smartfoni haqida yozgan edi.
