O‘zbekiston bozorida Chevrolet Damas 3 modeli paydo bo‘ldi. Yangi mikroavtobus yo‘lovchi tashishga mo‘ljallangan Move hamda yuk tashish uchun ishlab chiqilgan Max versiyalarida taklif etiladi. Model narxi, texnik imkoniyatlari va jihozlanishi bilan kichik biznes vakillari hamda ixcham oilaviy avtomobil izlayotgan xaridorlar e’tiborini tortmoqda.
Chevrolet Damas 3’ning boshlang‘ich narxi 134,439 mln so‘m etib belgilangan. Bu uni MDH bozoridagi eng arzon yangi mikroavtobuslardan biriga aylantiradi. Taqqoslash uchun, Rossiya bozorida bu summa qariyb 889 ming rublga teng bo‘lib, ayrim Lada Granta versiyalaridan ham pastroq narx hisoblanadi.
Model Wuling Hongguang V platformasi asosida ishlab chiqilgan. Damas 3 uchun ikki xil benzinli dvigatel taklif etiladi: 1,2 litrli 81 ot kuchiga ega motor va 1,5 litrli 103 ot kuchiga ega agregat. Har ikkisi mexanik uzatmalar qutisi bilan ishlaydi. Xaridorlar 5 yoki 6 pog‘onali transmissiyani tanlashi mumkin.
Bu avtomobilni kundalik qatnov, yo‘lovchi tashish yoki kichik yuklarni yetkazib berish kabi turli vazifalarga moslashtirish imkonini beradi.
Chevrolet Damas 3 jihozlari ro‘yxatiga oddiy asboblar paneli, elektr rul kuchaytirgichi, ABS va EBD tizimlari, ikkita xavfsizlik yostiqchasi hamda radio, USB va Bluetooth’ni qo‘llab-quvvatlaydigan multimedia tizimi kiritilgan. Model ishlab chiqarilishi UzAuto‘ning Pitnakdagi zavodida yo‘lga qo‘yilgani ta’kidlanmoqda.
Damas 3’ning bozorga chiqishi O‘zbekistondagi budjet tijorat va oilaviy avtomobillar segmentida raqobatni kuchaytirishi kutilmoqda. Ayniqsa, kichik tadbirkorlar, yetkazib berish xizmati bilan shug‘ullanuvchilar va arzon, sodda hamda xizmat ko‘rsatish xarajatlari past transport izlayotgan oilalar uchun model qiziqarli tanlovga aylanishi mumkin.
Qaynoq24.uz yangi Chevrolet Damas eskisidan nimasi bilan farq qilishi haqida yozgan edi.
