Chevrolet Cobalt avtomobili O‘zbekistondagi avtosalonlarda kredit asosida xarid qilish uchun taklif etila boshlandi. UzAuto Motors tomonidan yo‘lga qo‘yilgan Cobalt Special dasturi yangi komplektatsiya emas, balki avtomobilni bank krediti orqali sotib olish imkonini beruvchi moliyaviy dastur hisoblanadi.
Dastur “Ipoteka-bank” orqali yillik 21 foiz stavka asosida rasmiylashtiriladi. Bu stavka Chevrolet’ning boshqa modellari uchun taklif etilayotgan kredit shartlaridan pastroq, chunki qolgan modellar bo‘yicha stavkalar kamida 25 foizdan boshlanadi.
Cobalt Special shartlariga ko‘ra, foiz stavkasi boshlang‘ich to‘lov miqdoriga bog‘liq emas. Xaridor avtomobil qiymatining 30, 40 yoki 50 foizini dastlabki to‘lov sifatida kiritishi mumkin. Kreditning maksimal muddati 5 yilni tashkil etadi.
Masalan, Cobalt MCM Style bazaviy komplektatsiyasining narxi 156,1 mln so‘m bo‘lsa, 30 foizlik boshlang‘ich to‘lov 46,83 mln so‘mni tashkil qiladi. Shunda kredit summasi 109,27 mln so‘m bo‘ladi. Agar avtomobil 5 yil muddatga yillik 21 foiz stavkada rasmiylashtirilsa, oylik to‘lov taxminan 2,95 mln so‘m atrofida chiqadi.
Bunday shartlarda xaridor 5 yil davomida bankka jami qariyb 177,3 mln so‘m to‘laydi. Boshlang‘ich to‘lov bilan birga avtomobil uchun umumiy xarajat taxminan 224,1 mln so‘mga yetadi. Bu avtomobilning naqd sotib olingandagi narxidan qariyb 68 mln so‘mga ko‘p. Ortiqcha to‘lov avtomobil qiymatining taxminan 44 foiziga teng bo‘ladi.
Agar shu avtomobil 3 yil muddatga kreditga olinsa, oylik to‘lov taxminan 4,1 mln so‘m atrofida bo‘ladi. Biroq umumiy ortiqcha to‘lov sezilarli darajada kamayib, qariyb 39,1 mln so‘mni tashkil etadi. Shu sababli qisqaroq muddat xaridor uchun umumiy xarajat nuqtayi nazaridan foydaliroq bo‘lishi mumkin.
Keyin nima bo‘ladi
Kredit rasmiylashtirilganda avtomobil qarz to‘liq yopilgunga qadar bank garovida qoladi. Shuningdek, KASKO sug‘urta polisini rasmiylashtirish majburiy hisoblanadi. Ushbu xarajat ham xaridor zimmasiga tushadi.
Cobalt Special dasturining ishga tushirilishi O‘zbekiston avtomobil bozoridagi o‘zgarishlar fonida e’tiborga molik bo‘ldi. 2025-yilda Cobalt defitsit model hisoblanib, xaridorlar avtomobilni tezroq olish uchun vositachilarga o‘nlab million so‘mlik qo‘shimcha to‘lovlar qilishga tayyor edi. Hozir esa Cobalt avtomobillari avtosalonlarda erkin sotuvda mavjud bo‘lib, navbat va qo‘shimcha to‘lovlarsiz xarid qilish imkoniyati paydo bo‘lgan.
Qaynoq24.uz eng yaxshi Chevrolet avtomobillari haqida yozgan edi.
