Grenlandiya bosh vaziri Yens-Frederik Nilson agar AQSh va Daniya o‘rtasida tanlov qilish zarurati tug‘ilsa, Grenlandiya hozir va ayni paytda Daniyani tanlashini ma’lum qildi. U bu bayonotni Kopengagenda Daniya bosh vaziri Mette Frederiksen bilan uchrashuv chog‘ida bildirdi.
Mazkur fikr Donald Tramp Grenlandiyani AQSh tarkibiga qo‘shish g‘oyasini yana kun tartibiga qaytargan bir vaqtda yangradi. Tramp Grenlandiyani AQSh milliy xavfsizligi uchun muhim hudud deb atab, uni Rossiya va Xitoyga qarshi strategik himoya sifatida ko‘rishini aytgan. Oq uyda orolni sotib olish masalasi muhokama qilingani ham eslatildi.
Daniya NATO a’zosi hisoblanadi. Mette Frederiksenning ta’kidlashicha, transatlantik harbiy ittifoqqa putur yetkazadigan bosim Daniya uchun qabul qilib bo‘lmaydi. Uning aytishicha, mamlakat eng yaqin ittifoqchisidan bunday keskinlikni kutmaydi va oldinda murakkab davr turibdi.
Grenlandiya rahbari vaziyatni geosiyosiy nuqtayi nazardan baholab, orolning AQSh tomonidan sotib olinishi, boshqarilishi yoki Qo‘shma Shtatlar tarkibiga qo‘shilishiga qarshi ekanini ochiq bildirdi.
Donald Tramp esa jurnalistlar savoliga javoban o‘z pozitsiyasidan voz kechmaganini, Grenlandiya masalasi AQSh uchun muhimligicha qolayotganini ta’kidladi.
Qaynoq24.uz AQSh Grenlandiya aholisiga 100 ming dollardan pul to‘lashi mumkinligi haqida yozgan edi.
