Realme 10 000 mA/soat sig‘imli batareyaga ega yangi smartfonini yaqin orada taqdim etadi. Kompaniya silikon-uglerod texnologiyasiga asoslangan katta sig‘imli akkumulyatorlar trendiga jiddiy kirib kelmoqda. Shu yo‘nalishdagi ilk model yaqin kunlarda namoyish etilishi kutilmoqda.
Ma’lumotlarga ko‘ra, RMX5107 indeksli smartfon 10 001 mA/soat batareya bilan sertifikatsiyadan o‘tdi. Qurilma Hindistonning BIS bazasida ro‘yxatdan ham o‘tkazilgan. Bu esa model aynan Hindiston bozoriga mo‘ljallanganini ko‘rsatadi. Insayder Yogesh Brarga ko‘ra, yangilik Realme P seriyasiga mansub bo‘ladi va shu oy taqdim etiladi.
Realme’ning P seriyasi katta batareyali smartfonlari bilan tanilgan. Masalan, avval taqdim etilgan Realme P4x modeli 7 000 mA/soatli akkumulyator bilan chiqqan edi. So‘nggi yillarda 8 000 mA/soat sig‘im oddiy holga aylana boshlagan bo‘lsa-da, Realme bu ko‘rsatkichdan ham o‘tib, yangi bosqichni sinab ko‘rmoqda.
Taqqoslash uchun, Realme Neo8 modeli 22-yanvar kuni Xitoyda 8 000 mA/soatli batareya bilan taqdim etilishi rejalashtirilgan. Ammo P seriyasidagi yangi qurilma 10 000 mA/soat bilan kompaniyaning “batareya qiroli” unvonini egallashi mumkin.
Hozircha smartfonning protsessori, displey o‘lchami va boshqa texnik xususiyatlari noma’lum. Odatda Realme P seriyasi o‘rta toifadagi qurilmalarni o‘z ichiga oladi. Shunga qaramay, mutaxassislar bunday katta batareya samarali chipset va keng ekran bilan uyg‘unlashtirilishini kutmoqda.
Qaynoq24,uz Realme 16 Pro va 16 Pro+ taqdim etilgani haqida yozgan edi.
