Samsung mobil qurilmalar uchun Samsung Gaming Hub ilovasini yangiladi. Bu haqda Sammobile nashri xabar bermoqda. Yangi versiya foydalanuvchilarga yanada shaxsiylashtirilgan tajriba taqdim etadi va o‘yinlarni osonroq topish hamda ulashish imkonini beradi.
Yangilanish platformadan foydalanayotgan 160 mln dan ortiq oylik faol foydalanuvchilar uchun qulayliklarni oshirishga qaratilgan. Endilikda Galaxy Store’dagi barcha o‘yinlar bitta joyda jamlangan. Foydalanuvchilar o‘z kutubxonalarini tezda ko‘rishi va yangi o‘yinlarni topishi mumkin.
Gaming Hub interfeysi qayta ishlangan bo‘lib, asosiy e’tibor shaxsiy tavsiyalarga qaratilgan. Platforma foydalanuvchi qiziqishlari asosida o‘yinlarni tavsiya qiladi va mos kontentni ilgari suradi.
Bundan tashqari, ilovaga video kontent integratsiya qilindi. Endi Gaming Hub ichida YouTube’dan olingan geympley lavhalari va qo‘llanmalarni tomosha qilish mumkin. Videolar ham foydalanuvchining faolligiga qarab moslab taqdim etiladi.
Samsung ushbu yangilanish orqali mobil geymingdagi muammolardan birini, ya’ni murakkab interfeys va ortiqcha reklama sabab o‘yin topish qiyinligini bartaraf etishni maqsad qilgan. Yangi tizim o‘yinlarni ko‘rish, o‘rganish va o‘ynashni yanada intuitiv qiladi.
Samsung Gaming Hub’ning yangi versiyasi hozirda butun dunyo bo‘ylab smartfon va planshetlar uchun Galaxy Store orqali yuklab olish uchun mavjud.
Qaynoq24.uz Samsung kompaniyasi odamlarni qanday «aldagan»i haqida yozgan edi.
