Honor Magic8 Pro Air smartfoni ochilish videolari chiqqanidan so‘ng ijtimoiy tarmoqlarda iliq fikrlar bilan kutib olindi. Gizmochina nashri model sharhini tayyorladi.
Qurilma atigi 155 gramm vaznga ega va 6,3 dyuymli ekran bilan jihozlangan. Bu ko‘rsatkichlar uni bozordagi “Air” nomli ko‘plab modellardan ham yengilroq qiladi. Magic8 Pro Air ixcham va qulay telefonlar davrini eslatib, katta va og‘ir smartfonlardan charchagan foydalanuvchilar uchun ishlab chiqilgandek.
Dizayn va ergonomika
Yupqa va yengil korpusga qaramay, Magic8 Pro Air asosiy imkoniyatlardan voz kechmagan. Qurilmada IR-blaster, NFC, stereo karnaylar, simsiz quvvatlash va jismoniy SIM-karta uyasi mavjud. USB 2.0 portidan tashqari, sezilarli kamchilik deyarli yo‘q. Uch kamerali modul vazn markazini biroz yuqoriga siljitadi, biroq telefon shunchalik yengilki, qo‘lda noqulaylik sezilmaydi. Muallif ta’kidlashicha, Magic8 Pro Air’ning biroz qalinroq korpusi ayrim juda yupqa modellarga qaraganda qo‘lda ancha ishonchli ushlanadi.
Kamera imkoniyatlari
Magic8 Pro Air uch kamerali tizim bilan jihozlangan. Asosiy kamera flagman darajasida ishlaydi. Ranglar jonli, fonni xiralashtirish effekti aniq va yoqimli. Telefoto kamera 3,2 karra optik yaqinlashtirishni taklif etadi va kundalik suratga olish uchun juda mos. Tasvir sifati aksariyat holatlarda asosiy kameradan deyarli qolishmaydi, hattoki 6,4 karra zoomda ham barqaror natija ko‘rsatadi.
Ultra keng burchakli kamera esa eng zaif bo‘g‘in sifatida baholangan. Yoruq kunda 50 megapikselli modul o‘zini yaxshi ko‘rsatadi, biroq yorug‘lik kamayganda tasvir sifati, ayniqsa chekka joylarda, keskin pasayadi. Video rejimida ham ultra keng kamera kutilgan darajada ishlamaydi. Shunga qaramay, umumiy hisobda bu og‘irligi 155 gramm bo‘lgan smartfon uchun juda kuchli kamera to‘plami hisoblanadi.
Ishlash tezligi
HONOR Magic8 Pro Air Dimensity 9500 protsessori bilan ishlaydi. Ushbu chip bozordagi eng kuchli mobil platformalardan biri sanaladi. Testlarga ko‘ra, telefon Honkai: Star Rail kabi og‘ir o‘yinlarda ham yuqori kadrlar soni va samarali energiya boshqaruvini ta’minlaydi. Qurilmada sun’iy intellekt asosidagi kadr oshirish texnologiyalari yo‘q, ammo real ishlash ko‘rsatkichi ko‘plab flagmanlardan kam emas.
Ekran va batareya
Ekran sozlamalari batareya ishlash muddati bilan yaxshi muvozanatlangan. Kundalik foydalanishda tasvir aniq va tabiiy ko‘rinadi, energiya sarfi esa me’yorida qoladi. Katta sig‘imli batareya bilan birga bu qurilma faol geymerlar uchun ham, oddiy foydalanuvchilar uchun ham yetarli mustaqillikni ta’minlaydi. Amaliy sinovlarda 15 daqiqalik og‘ir o‘yin atigi 6 foiz zaryad sarflagani qayd etilgan.
Qaynoq24.uz Infinix NOTE Edge smartfoni haqida yozgan edi.
