Eron AQSh va Isroil bilan ehtimoliy yangi qarama-qarshilik fonida hali jang maydonida qo‘llanmagan zamonaviy qurollarga ega ekanini bildirdi. Bu haqda harbiy manbaga tayanib, Tasnim agentligi xabar berdi.
Eronlik harbiy manbaning RIA Novosti’ga aytishicha, Tehron o‘zida hali amalda sinovdan o‘tmagan zamonaviy qurollar mavjudligini ma’lum qilgan. Manba bu bayonotni AQSh va Isroil tomonidan ehtimoliy yangi bosimlar kuchaygani fonida bildirgan.
“Biz mamlakat ichida zamonaviy qurollar ishlab chiqarganmiz. Ular hali jang maydonida qo‘llanmagan va amalda sinovdan o‘tmagan”, dedi manba.
Uning ta’kidlashicha, Eron mudofaa infratuzilmasi va harbiy texnika bo‘yicha yetishmovchilikka duch kelmayapti. Manba Tehron mamlakatni himoya qilish uchun zarur imkoniyatlarga ega ekanini aytdi.
Shu kuni Islom inqilobi qo‘riqchilari korpusi ham bayonot bilan chiqdi. Unda Eronga qarshi yangi hujum mojaroning mintaqa doirasidan chiqib ketishiga olib kelishi mumkinligi haqida ogohlantirilgan.
Korpus bayonotida Eron avvalgi qarama-qarshiliklarda o‘zining barcha imkoniyatlaridan foydalanmagani aytiladi. Tashkilot AQSh va Isroilni “avvalgi strategik mag‘lubiyatlardan xulosa chiqarmaganlikda” aybladi.
“Ular dunyodagi eng qimmat armiyalardan ikkitasining barcha imkoniyatlari bilan bizga hujum qildi. Ammo biz Islom inqilobining barcha salohiyatini ularga qarshi ishga solmadik”, deyiladi bayonotda.
IRGC yangi tajovuz takrorlansa, zarbalar yanada kengroq bo‘lishini bildirdi. Bayonotda mojaro “mintaqadan tashqariga chiqishi” mumkinligi ta’kidlangan.
Eron tomoni bu bayonotlarni AQSh tomonidan yangragan so‘nggi tahdidlar fonida bermoqda. Tehron avval ham mamlakat mudofaa salohiyati kuchaytirilgani va yangi urush yanada jiddiy oqibatlarga olib kelishi mumkinligini bildirgan.
Hozircha Eron aytayotgan yangi qurollarning turi, texnik xususiyatlari yoki qaysi yo‘nalishda qo‘llanishi mumkinligi ochiqlanmagan. Rasmiy Tehron faqat ularning mamlakat ichida ishlab chiqilganini va jangovar sharoitda hali qo‘llanmaganini bildirmoqda.
Qaynoq24.uz Aroqchi Eronga qarshi yangi urush bo‘lsa, javoblar yanada kutilmagan bo‘lishini aytgan edi.
