Eron prezidenti ma’muriyati Mas’ud Pezeshkiyan iste’foga chiqqani haqidagi xabarlarni rad etdi. Bu haqda Mas’ud Pezeshkiyan ma’muriyati kommunikatsiyalar departamenti rahbari o‘rinbosari Mehdi Tabotaboi ma’lum qildi.
Tabotaboi X ijtimoiy tarmog‘idagi sahifasida ushbu da’volarga munosabat bildirdi. Uning aytishicha, Pezeshkiyan xalqqa xizmat qilish yo‘lidan qaytmaydi. U prezident iste’fosi haqidagi xabarlarni ayrim xorijiy OAVlarning “o‘yinlari” davomi deb atadi. Tabotaboi bunday xabarlar haqiqatga mos kelmasligini ta’kidladi.
Shuningdek, u Eron xalqi birlik va hamjihatlikdan voz kechmasligini bildirdi. Uning so‘zlariga ko‘ra, eronliklarning milliy birligini buzishga urinishlar natija bermaydi.
Avvalroq ayrim manbalarda Mas’ud Pezeshkiyan iste’foga chiqishi mumkinligi haqida xabarlar tarqalgan edi. Rasmiy Tehron esa bu ma’lumotlarni inkor qildi.
Qaynoq24.uz Mas’ud Pezeshkiyan internetga kirishni tiklashni buyurgani haqida yozgan edi.
