Namangan viloyatida yirik hajmdagi noqonuniy tamaki mahsulotlari savdosining oldi olindi. Bu haqda Bosh prokuratura huzuridagi Departament xabar berdi.
Tezkor tadbir davomida fuqaro B.N. qo‘lga olindi. U tamaki mahsulotlarini noqonuniy sotish bilan shug‘ullanib kelgan. Aniqlanishicha, u “KIA BONGO” yuk avtomobilida 60 ming quti tamaki olib ketayotgan bo‘lgan. Mahsulotlar “Milano London” va “Oris Change” brendlariga tegishli.
Ularning umumiy qiymati 920 mln so‘mni tashkil etadi. Tamakilar aktsiz markasiz bo‘lgan. Fuqaro mahsulotlarni Chust tumani “Toshqo‘rg‘on” MFY hududidagi uyga olib kelayotgan vaqtda ushlangan. Barcha tamaki mahsulotlari dalil sifatida musodara qilingan.
Mazkur holat yuzasidan Jinoyat kodeksining 186-1-moddasi bilan jinoyat ishi qo‘zg‘atilgan. Hozirda tergov harakatlari davom etmoqda.
Qaynoq24.uz Ohangaron va Jomboyda elektrdan noqonuniy foydalanish fosh etilgani haqida yozgan edi.
