Samsung Galaxy A57 smartfoni Niderlandiyada chegirma bilan sotuvga chiqdi. Bu haqda Sammobile xabar berdi.
Asosiy model narxi o‘zgarmadi. 128 GB xotira va 8 GB RAMli versiya 529 yevro turadi. Biroq yuqori xotirali variantlar arzonlashdi. 256 GB va 512 GB modellariga 30 yevro chegirma berilmoqda.
Trade-in dasturi ham yaxshilandi. Eski Galaxy qurilmasini topshirganlar yana 120 yevro chegirma olishi mumkin. Bundan tashqari, aksessuarlar uchun 50% chegirma taqdim etilmoqda. Galaxy gadjetlari va planshetlarga esa 30% chegirma bor.
Samsung Care+ xizmatini tanlaganlar uchun yana bonus bor. Birinchi uch oy bepul beriladi. Smartfon to‘rtta rangda taqdim etilgan. Ular orasida Awesome Navy, Gray, Icyblue va Lilac ranglari bor. Chegirmalar cheklangan muddat davomida amal qiladi.
Model haqida
Samsung Galaxy A57 o‘rta segment smartfoni bo‘lsa ham, texnik jihatdan flagmanlarga yaqinlashgan model hisoblanadi. Qurilma yangi Exynos 1680 protsessori asosida ishlaydi. Bu chip kundalik foydalanish, o‘yin va ko‘p vazifali ishlarni muammosiz bajaradi. Smartfon 6,7 dyuymli Super AMOLED displey bilan jihozlangan. Ekran 120 Hz yangilanish tezligini qo‘llab-quvvatlaydi. Bu esa interfeys va animatsiyalarni ancha silliq qiladi. Yorqinlik darajasi yuqori bo‘lib, quyosh ostida ham ekran yaxshi ko‘rinadi.
Kamera tizimi uchta moduldan iborat. Asosiy sensor 50 MP bo‘lib, keng burchakli suratlar oladi. Undan tashqari ultra keng va makro kameralar ham mavjud. Selfi uchun 12 MP kamera o‘rnatilgan va 4K video yozish imkoniyati bor. Qurilma 5000 mAh sig‘imli batareya bilan keladi. 45W tezkor zaryadlash qo‘llab-quvvatlanadi. Bu esa telefonni qisqa vaqt ichida to‘ldirish imkonini beradi.
Qaynoq24.uz Samsung Messages ilovasi nega yopilishi haqida yozgan edi.
