Samsung kompaniyasi Samsung Galaxy M47 5G smartfoni Hindistonda 29-iyun kuni taqdim etilishini tasdiqladi. Bu haqda Gizmochina xabar berdi.
Qurilmaning taqdimot sanasi Amazon’dagi maxsus sahifa orqali ma’lum bo‘ldi. Ushbu sahifada smartfonning bir qator apparat va dasturiy imkoniyatlari ham ochiqlangan.
Galaxy M47 5G Snapdragon protsessori, LPDDR5X tezkor xotira va UFS 3.1 ichki xotira bilan jihozlanadi. Samsung modelni o‘yinlar va ko‘p vazifali ishlash uchun mos qurilma sifatida ilgari surmoqda.
Kompaniya smartfon uchun oltita avlod Android operatsion tizimi yangilanishi va olti yil davomida xavfsizlik yangilanishlarini taqdim etishni va’da qilgan. Bu Galaxy M47 5G‘ning uzoq muddat dasturiy qo‘llab-quvvatlanishini anglatadi.
Qurilma 6,7 dyuymli Super AMOLED displeyga ega bo‘ladi. Ekran 120 Gs yangilanish chastotasini qo‘llab-quvvatlaydi. Samsung‘ning ta’kidlashicha, panel aniq tasvir, silliq aylantirish va yorqin tashqi muhitda ham yaxshi ko‘rinishni ta’minlashga mo‘ljallangan.
Displey Corning Gorilla Glass Victus+ himoyasi bilan qoplanadi. Ushbu himoya oddiy himoya oynalariga qaraganda tirnalishga nisbatan to‘rt baravargacha yaxshiroq chidamlilik berishi aytilmoqda.
Galaxy M47 5G 45 Vt tezkor quvvatlashni qo‘llab-quvvatlaydi. Shuningdek, unda bypass charging funksiyasi ham bo‘ladi. Bu imkoniyat o‘yin vaqtida quvvatni to‘g‘ridan-to‘g‘ri qurilmaga yo‘naltirib, qizish va batareyaga tushadigan yukni kamaytirishga yordam beradi. Samsung hozircha smartfon batareyasi sig‘imini ochiqlamagan.
Kamera tizimida optik stabilizatsiyaga ega 50 megapikselli asosiy sensor ishlatiladi. Bundan tashqari, 5 megapikselli ultra keng burchakli kamera, 2 megapikselli makro sensor va 12 megapikselli old kamera mavjud bo‘ladi.
Smartfon old va orqa kameralar orqali 4K video yozishni qo‘llab-quvvatlaydi. Bu qurilmani foto va video imkoniyatlari bo‘yicha ham o‘rta segmentda raqobatbardosh modelga aylantiradi.
Galaxy M47 5G Rogue Red va Blaze Blue ranglarida sotuvga chiqadi. Hozircha uning narxi haqida ma’lumot berilmagan.
Qaynoq24.uz Samsung Galaxy A57 smartfoni uchun xavfsizlik yangilanishi chiqarilgani haqida yozgan edi.
