O‘zbekiston Respublikasi Prezidenti Administratsiyasi rahbarining farmoyishi bilan Strategik rivojlanish va islohotlar agentligi rahbariyatida yangi tayinlovlar amalga oshirildi.
Abdulla Abduqodirov O‘zbekiston Respublikasi Prezidenti huzuridagi Strategik rivojlanish va islohotlar agentligi direktorining birinchi o‘rinbosari lavozimiga tayinlandi.
Taxirjon Safarov esa agentlik direktorining o‘rinbosari lavozimini egalladi. Shu munosabat bilan u Prezident Administratsiyasining Huquqiy ekspertiza va kompleks tahlil qilish departamenti sho‘ba mudiri lavozimidan ozod etildi.
Prezidentning 12-maydagi farmoni bilan Abdulla Abduqodirov Strategik rivojlanish va islohotlar agentligi direktori vazifasini bajaruvchi etib tayinlangan edi. U 2022-yil dekabridan buyon agentlik direktorining birinchi o‘rinbosari lavozimida ishlab kelgan.
Davlat rahbarining 10-iyuldagi farmoniga muvofiq, Sardor Umurzoqov Strategik rivojlanish va islohotlar agentligi direktori lavozimiga tayinlandi. Shu munosabat bilan u prezidentning strategik rivojlanish bo‘yicha maslahatchisi lavozimidan ozod etildi. Mazkur maslahatchi lavozimi ham tugatildi.
