AQSh prezidenti Donald Tramp 28-iyul, seshanba kuni Ukraina prezidenti Volodimir Zelenskiyni Oq uyda qabul qiladi. Uchrashuv o‘tkazilishini AQSh prezident ma’muriyati vakili Axios nashriga tasdiqladi.
Tashrif Rossiya Ukrainaga qarshi raketa hujumlarini kuchaytirayotgan bir paytga to‘g‘ri kelmoqda. Zelenskiy muzokaralar davomida Vashingtonning Kiyevni qo‘llab-quvvatlashini mustahkamlash, jumladan, Ukraina havo mudofaasi imkoniyatlarini kengaytirish masalasini ko‘tarishi kutilmoqda.
Tramp va Zelenskiy oxirgi marta iyul oyining boshida Turkiyada o‘tkazilgan NATO sammitida uchrashgan edi. O‘shanda tomonlar Ukraina havo mudofaasini kuchaytirish hamda urushni diplomatik yo‘l bilan yakunlash bo‘yicha sa’y-harakatlarni muhokama qilgan.
ABC News ma’lumotiga ko‘ra, Ukraina prezidenti Vashingtonga senator Lindsi Gremning dafn marosimida qatnashish uchun boradi. Grem AQSh Kongressida Ukrainani faol qo‘llab-quvvatlagan siyosatchilardan biri bo‘lgan va vafotidan oldin Zelenskiy bilan Kiyevda uchrashgan edi.
Tashrif AQShdagi ayrim o‘ng qanot faollari va sharhlovchilarining Ukraina masalasidagi qarashlari o‘zgarayotgan bir davrda amalga oshirilmoqda. Avval Kiyevga yordam berishga qarshi chiqqan Tramp tarafdori Laura Lumer Zelenskiy bilan uchrashgach, Rossiya targ‘iboti ta’sirida bo‘lganini tan oldi. Tramp uning Ukraina prezidenti bilan suhbatini Truth Social tarmog‘ida ijobiy baholadi.
Rossiya so‘nggi kunlarda ballistik raketalardan foydalanishni kuchaytirib, 26-iyul kuni Kiyevga yana zarba berdi. Ukraina esa bunga javoban Rossiya hududidagi nishonlarga uzoq masofali dronlar bilan hujumlarni faollashtirmoqda.
Qaynoq24.uz Ukrainada 200 dan ortiq temiryo‘l shikastlangani haqida yozgan edi.
