AQSh vitse-prezidenti Jeyms Devid Vens Eron bilan o‘t ochishni to‘xtatish muzokaralari Livanni qamrab olmaganini ma’lum qildi. U bu haqda Budapeshtda jurnalistlarga bergan intervyusida gapirdi.
Vensning aytishicha, vaziyat oddiy tushunmovchilikdan kelib chiqqan. Eron tomoni kelishuv Livanni ham o‘z ichiga oladi deb o‘ylagan. Ammo AQSh bunday va’da bermagan. Shu bilan birga, u Isroil Livandagi harbiy harakatlarni ma’lum darajada cheklashni taklif qilganini qo‘shimcha qildi. Bu muzokaralar muvaffaqiyatli bo‘lishi uchun qilingan.
Vensning bayonoti Isroilning Livan hududiga bergan yirik zarbalaridan keyin yangradi. Bu hujumlar Donald Tramp e’lon qilgan ikki haftalik sulhning ilk kunlaridayoq amalga oshirilgan. Zarbalardan so‘ng Eron yana Hormuz bo‘g‘ozi orqali kemalar harakatini amalda to‘xtatdi. Bu dunyodagi eng muhim neft yo‘llaridan biri hisoblanadi.
Eron davlat axborot agentligi xabariga ko‘ra, sulhning ilk soatlarida bo‘g‘ozdan atigi ikki neft tankeri o‘tgan. Rejaga ko‘ra esa kuniga 10 ta kema o‘tkazilishi kerak edi. Avvalroq AQSh bu bo‘g‘oz orqali kemalar harakatini tiklashni asosiy talab sifatida qo‘ygan edi. So‘nggi haftalarda aynan shu masala muzokaralarning markazida bo‘lgan.
Qaynoq24.uz AQSh va Eron 2 haftalik sulhga kelishgani haqida yozgan edi.
