Vivo‘ning kutilayotgan X500 seriyasi haqida yangi ma’lumotlar paydo bo‘ldi. Weibo‘dagi Digital Chat Station taxallusli insayderga ko‘ra, X500 Pro yoki Vivo X500 Pro Mini nomi bilan chiqishi mumkin bo‘lgan model 2 nanometrli Dimensity 9600 Pro chipi va 6,37 dyuymli displey bilan jihozlanadi.
Kamera qismida smartfon 1/1,28 dyuymli 50 megapikselli asosiy sensor olishi aytilmoqda. Ushbu kamera LOFIC texnologiyasini qo‘llab-quvvatlaydi. Bundan tashqari, qurilmada 50 megapikselli ultra keng burchakli kamera ham bo‘ladi, biroq uning sensori nisbatan kichikroq bo‘lishi kutilmoqda.
Portret suratlar uchun 64 megapikselli 85 mm periskop kamera ishlatilishi mumkin. Digital Chat Station’ning qo‘shimcha qilishicha, ushbu periskop obyektiv makro suratga olishni ham qo‘llab-quvvatlaydi. Bu avvalroq tarqalgan kamera konfiguratsiyasi haqidagi ma’lumotlarga mos keladi.
Insayderning aytishicha, Vivo X500 Pro seriyasidagi barcha modellar 85 mm periskop obyektivga ega bo‘ladi. Bu esa mazkur qurilmaning Pro liniyasiga mansub bo‘lishini deyarli tasdiqlaydi. Hozircha uning X500 Pro yoki X500 Pro Mini nomi bilan chiqishi ochiq qolmoqda.
Seriyaning oddiy Vivo X500 modeli 6,59 dyuymli displey va 3 nanometrli Dimensity 9500 chipi bilan jihozlanishi kutilmoqda. Bu protsessor avvalgi avlodda ham ishlatilgan. X500 Pro Max esa 6,85 dyuymli 2K OLED LTPO ekran va Dimensity 9600 Pro platformasini olishi mumkin.
Vivo X300 seriyasidan farqli ravishda, X500 liniyasida kompaniya modellarni aniqroq segmentlarga ajratayotgani ko‘rinmoqda. Bazaviy X500 nisbatan qulayroq variant bo‘lsa, Pro va Pro Max talqinlari premium imkoniyatlarga ega bo‘ladi.
Vivo X500 seriyasi 2026-yil oxirigacha, ehtimol oktabr oyidan oldin taqdim etilishi kutilmoqda. Eng yuqori flagman hisoblangan X500 Ultra esa 2027-yil boshida chiqishi mumkin.
Qaynoq24.uz Vivo X Fold 6 7000 mA/soat batareya va kuchli suv himoyasiga ega bo‘lishi haqida yozgan edi.
