Farg‘ona viloyatida energiya resurslaridan noqonuniy foydalanish bilan bog‘liq bir nechta holat aniqlandi. Bu haqda Bosh prokuratura huzuridagi Departament ma’lum qildi.
Ma’lumotlarga ko‘ra, Rishton tumanida faoliyat yurituvchi korxona rahbari umumiy ovqatlanish shoxobchasida tabiiy gaz tarmog‘iga ruxsatsiz ulangan. Natijada 164,1 mln so‘mlik gazdan noqonuniy foydalangan. Bag‘dod tumanida esa yakka tartibdagi tadbirkor noturar binosida elektr tarmog‘iga to‘g‘ridan-to‘g‘ri ulanib, 134,7 mln so‘mlik elektr energiyasini noqonuniy ishlatgani aniqlangan.
Yana bir holat Farg‘ona tumanida qayd etilgan. U yerda mas’ullar do‘konda elektr tarmog‘iga o‘zboshimchalik bilan ulanib, 118 mln so‘mlik elektrdan noqonuniy foydalangan. Ushbu holatlar yuzasidan Jinoyat kodeksining 169-moddasi bilan jinoyat ishlari qo‘zg‘atilgan. Hozirda tergov harakatlari davom etmoqda.
Qaynoq24.uz Andijonda “Haj”ga yuborishni va’da qilgan shaxs ushlangani haqida yozgan edi.
