Vivo kompaniyasi tomonidan taqdim etiladigan yangi Vivo S60 smartfoni eski chipset bilan chiqishi mumkin. Bu haqda Gizmochina nashri xabar berdi.
Vivo yangi S60 smartfonini taqdim etishga tayyorlanmoqda. Biroq Geekbench bazasida paydo bo‘lgan ma’lumotlar qurilmada katta apparat yangilanishi bo‘lmasligini ko‘rsatdi. Ro‘yxatda smartfon V2571A model raqami bilan qayd etilgan. Unda Qualcomm Snapdragon 8s Gen 3 chipseti ishlatilgani ko‘rsatilgan. Bu protsessor avval Vivo S50 modelida ham qo‘llangan edi.
Snapdragon 8s Gen 3 bitta 3,01 GHz chastotali asosiy yadroga ega. Unda to‘rtta 2,80 GHz chastotali samarador yadro va uchta 2,02 GHz chastotali tejamkor yadro mavjud. Grafik ishlov berish uchun Adreno 735 GPU javob beradi. Geekbench ma’lumotiga ko‘ra, Vivo S60 Android 16 operatsion tizimida ishlaydi. Qurilma 16 GBgacha tezkor xotira bilan taklif qilinishi mumkin.
Taqdimot qachon
Sinov natijalarida smartfon bitta yadroda 1 960 ball, ko‘p yadroli rejimda esa 5 194 ball to‘plagan. Vivo S60 taqdimoti 29-may kuni Xitoyda o‘tkazilishi kutilmoqda. Tadbirda kompaniya Vivo S60 va Vivo S60 Vitality Edition modellarini namoyish qilishi mumkin.
Har ikki model o‘xshash dizaynga ega bo‘lishi aytilmoqda. Smartfonlar Starry Sea, Early Summer Green va Midsummer Night ranglarida chiqarilishi kutilmoqda. Standart Vivo S60 16 GBgacha tezkor xotira va 512 GBgacha ichki xotira bilan sotuvga chiqishi mumkin. Vitality Edition esa 8 GB tezkor xotira va 256 GB ichki xotiradan boshlanadigan arzonroq versiya bo‘lishi taxmin qilinmoqda.
Mish-mishlarga ko‘ra, Vivo S60 6,59 dyuymli OLED displeyga ega bo‘ladi. Ekran 1,5K aniqlik va 120 Hz yangilanish chastotasini qo‘llab-quvvatlashi mumkin. Shuningdek, qurilmaga 7 200 mA/soat sig‘imli akkumulyator o‘rnatilishi kutilmoqda. U 90 W tezkor quvvatlash texnologiyasini qo‘llab-quvvatlashi mumkin.
Kamera qismida 50 MP asosiy modulga ega uchlik kamera tizimi bo‘lishi aytilmoqda. Unga Sony IMX seriyasidagi periskop telefoto sensori ham kirishi mumkin. Bundan tashqari, Vivo S60 ultratovushli ekran osti barmoq izi skaneri, stereo karnaylar, X o‘qli chiziqli motor va IR port bilan jihozlanishi mumkin. Qurilma IP68 va IP69 standartlari bo‘yicha chang hamda suvdan himoya olishi kutilmoqda.
Hozircha Vivo S60’ning to‘liq texnik xususiyatlarini rasman tasdiqlamadi. Batafsil ma’lumotlar 29-maydagi taqdimotda e’lon qilinishi mumkin.
Qaynoq24.uz Vivo X500 seriyasi qanday imkoniyatlar bilan chiqishi haqida yozgan edi.
