Motorola kompaniyasining Motorola Edge 70 Pro smartfoni sharh uchun taqdim etildi. Model aprel oyida sotuvga chiqarilgan bo‘lib, Yevropada 8 GB tezkor va 256 GB ichki xotirali versiyasi 540 yevro narxda baholangan.
Smartfon turli bozorlarda Pantone ranglarida taklif etiladi. Xaridorlar Titan, Zinfandel, Lily White va Tea kabi rang variantlarini tanlashi mumkin. Qurilma qutisida smartfonning o‘zi, USB-C kabeli va MagSafe qo‘llab-quvvatlaydigan qattiq himoya g‘ilofi bor. Bu komplektatsiya foydalanuvchilar uchun yoqimli qo‘shimcha hisoblanadi.
Motorola Edge 70 Pro nomidan ham ko‘rinib turibdiki, yupqa va yengil korpusga ega. Uning qalinligi 7 millimetrdan biroz oshadi, vazni esa 190 grammni tashkil qiladi. Smartfonning old va orqa tomonlari bukilgan dizaynda ishlangan. Bunday yechim hozirgi klassik monoblok smartfonlar orasida kamroq uchraydi.
Qurilma qo‘lda qulay turadi, biroq korpus silliq bo‘lgani uchun undan ehtiyotkorlik bilan foydalanish tavsiya etiladi. Himoya g‘ilofining qutiga kiritilgani aynan shu jihatdan foydali bo‘lishi mumkin.
Edge 70 Pro boshqa Motorola smartfonlari kabi Android 16 asosidagi Hello UI interfeysida ishlaydi. Ushbu interfeys rang-barang dizayni, silliq ishlashi va keng moslashuv imkoniyatlari bilan ajralib turadi. U iOS’ga o‘xshatib ko‘chirilgan interfeys emas, balki Motorola’ning o‘ziga xos Android talqini sifatida baholanmoqda.
Qanday o‘zgarishlar bor
Yangi model avvalgi versiyaga nisbatan kamera borasida sezilarli yangilanish olgan. Xususan, unda yaxshilangan zum-kamera mavjud. 50 megapikselli 1/2,76 dyuymli sensor 81 millimetrli f/2.5 obyektiv ostida joylashgan. Avvalgi modelda esa 73 millimetrli f/2.0 obyektiv va 10 megapikselli sensor ishlatilgan edi.
Kamera tizimining qolgan qismi deyarli o‘zgarmagan. Smartfon asosiy kamera, ultra keng burchakli kamera va selfi-kamera uchun 50 megapikselli sensorlar to‘plamini saqlab qolgan. Bu esa qurilmani foto va video imkoniyatlari bo‘yicha yuqori segmentga yaqinlashtiradi.
Motorola Edge 70 Pro‘dagi yana bir muhim yangilanish batareya bilan bog‘liq. Smartfon 6500 mA·soat sig‘imli akkumulyator bilan jihozlangan. Taqqoslash uchun, avvalgi modelda 6000 mA/soat batareya ishlatilgan edi. Quvvatlash tezligi esa o‘zgarishsiz qolgan: qurilma 90 Vt simli va 15 Vt simsiz quvvatlashni qo‘llab-quvvatlaydi.
Qaynoq24.uz Motorola Signature smartfoni qachon taqdim etilishi haqida yozgan edi.
